Министерот за образование и наука, Арбер Адеми денеска на прес-конференција ги повика директорите и наставниците во основните и средните училишта утре да почнат со работа. Тој нагласи дека штрајк се организира во услови кога нема решение.

Министерот Арбер Адеми рече дека ќе продолжат разговорите со Синдикатот за образование, наука и култура (СОНК) и му порача на Синдикатот да не штрајкува и повика учебната година да почне утре.

„Штрајк се организира во услови кога нема решение. Ние имаме решение и одлука за повисока плата“, рече Адеми и додаде дека учебната година стартува со новиот Закон за основно образование и Законот за наставници кој е фокусиран на кариерниот развој на просветните работници.

Претседателот на Синдикатот, Јаким Неделков на прес-конференција изјави дека наставниците утре остануваат дома, а настава ќе има од вторник.

„Нашите членови и сите други кои не се наши членови, а сакаат да се приклучат, ќе бидат во штрајк. Тие ќе одат на работа, но ќе бидат во просторија одредена за штрајк и нема да ги прифаќаат учениците дојдени на училиште“, рече Неделков.