Во Бугарија постојат 67 лица заразени со вирусот корона, изјави на денешната прес-конференција генералот Венцислав Мутафчиски, кој ја предводи Националната оперативна група за вирусот Корона.

Во меѓувреме, 85 вработени во Втората градска болница поднесоа оставки до 16 часот во понеделникот, јави БТА.

Болницата била наменета за прием на пациенти со корона вирус.
Директорот на болницата, д-р Георги Тодоров, изјави за бТВ дека веќе две недели нема информации за судбината на болницата и нејзините пациенти.
Според него, во болницата нема доволно квалификувани специјалисти за лекување на пациенти со акутни респираторни проблеми.

Д-р Тодоров рече дека повеќето лекари биле во пензија и се загрижени за нивната безбедност додека работеле со пациенти со вирусот корона.
Претставници на болницата утрово се сретнаа со претставници на Бугарското медицинско здружение.

Градоначалничката на Софија, Јорданка Фандакова, која ја посети болницата, изјави за бТВ дека пациентите заразени со вирусот нема да бидат примени во болницата сè додека болницата не ја добие потребната опрема и персонал.