ВМРО-ДПМНЕ, според претходните најави, денеска треба да ги објави имињата на конкурентите кои ќе се борат да ја добијат поддржката од најголемата опозициска партија која ќе одбере само еден од нив како кандидат за претседател на Македонија на претстојните избори на пролет.

Извршниот комитет на ВМРО-ДПМНЕ вчера соопшти дека е одлучено конвенцијата за избор на кандидат за претседател на Република Македонија да се одржи на 1 март, иако првично беше најавено за 16 февруари. 

Јавниот повик траеше до 1 февруари, а последните информации се дека се пријавиле деветмина, меѓу кои професорката Гордана Силјановска како последна. Потврдени засега се имињата уште на пратеникот Влатко Ѓорчев и фракционерот Филип Петровски. Иако се споменуваат и имињата на Коце Трајановски, Саво Климовски и Игор Дурловски, од синоќа медиуми блиски до опозицијата тврдат дека преостанатите пријавени во главно не се познати за широката јавност. Помеѓу нив има имиња на професори од Машинскиот факултет и Природно математичкиот факултет. Кандидатура поднел и еден поранешен градоначалник на Виница, како и претседателот на Комората за енергетика.

Христијан Мицкоски, лидерот на ВМРО-ДПМНЕ, вчера од Брисел по средбите со европратеници од Европската народна партија истакна дека „последното тргување со правдата во Македонија му дава за право да стравува дека власта ќе се обиде да ги украде изборите“.
– Посочив дека има основани сомневања дека ваквото владеење на власта може да резултира со нерегуларности и фалсификување на претстојните избори.
Ги запознав моите соговорници за нашите стравувања дека Зоран Заев бегајќи од предвремени озбори сака да ги украде претседателските избори, односно истовремено сето она кое што се случуваше изминатиот период да биде определен вид доказ за неговите намери да ги украде претседателските избори. Организирањето на фер избори мора да стане услов за напредок на европските интеграции, истакна Мицкоски од Брисел на состанокот на ЕПП.