Како што пишува „Катимерини„ во центарот на грчката престолнина Атина, ќе се подигне споменик на Александар Велики.

Во тек се последните подготовки за подигнување на споменикот, кој ќе биде висок 3.5 метри. Оваа одлука за подигнување на споменик беше донесена на општинскиот совет на Атина.

Споменикот ќе биде дело на еден од најпознатите грчки скулптори Јанис Папас. 

До сега споменик на Александар Велики во Грција имаше само во Солун. Ова беше идеја на градот Атина, која наскоро ќе биде реализирана во целост.

Освен во Грција, „Воин на коњ“ — споменик со фонтана на кралот Александар Македонски се наоѓа и на плоштадот Македонија, во Скопје.

Споменикот бил најавен како дел од проектот Скопје 2014 и официјално бил отворен на 8 септември 2011 година, по повод дваесет години од прогласувањето на независноста на Република Македонија.

Скулптурата е висока 14,5 метри, изработена од бронза и поставена на бетонски постамент висок 10 метри.

Под споменикот се наоѓа фонтана. Околу фонтаната се поставени осум војници од бронза кои се високи по три метри, како и осум лавови, високи по два и пол метри, од кои четири се свртени кон фонтаната.

Од нивните усни тече вода. Останатите четири лавови се поставени на скалите и се во седечка, односно во чуварска положба. На столбот, постаментот на коњаникот, има три прстени со монтирани плочи на кои се претставени три битки. Меѓу нив има три прстени од бронза, со декорација и релјефни фигури. Од најгорниот прстен паѓа водена завеса, а нагоре се крева магла. Oд фонтаната свири музика.
Техничките процедури и активности околу поставувањето ги извршил стручен и професионален тим од Фрединандо Маринели од Фиренца, Италија, каде била изработена скулптурата.
Автор на делото е вајарката Валентина Стефановска.