Во Хрватска денеска започнува најавениот седмичен бојкот на малопродажниот синџир „Konzum“, врз основа на анкетата спроведена меѓу граѓаните од платформата „Halo inspektore“ објавена на нејзината фејсбук-станица на 5-ти февруари.

Со одлука на потрошувачите, првиот малопродажен синџир што ќе биде бојкотиран цела седмица – од саботата 8-ми февруари до петокот 14-ти февруари, е „Konzum“. Во анкетата се забележани 211.638 гласови од 144.732 гласачи од кои за бојкот на „Konzum“ се изјасниле 31,7 отсто од гласачите, следи малопродажниот синџир „Plodin“ со 29,1 отсто и „Studenac“ со 6,87 отсто.

Податоците од првите два бојкота покажуваат дека акциите на потрошувачите имаат реално влијание врз трговијата. Иако ефектот од вториот бојкот бил нешто помал, резултатите сè уште покажуваат значајно влијание: во споредба со 24 јануари, бројот на сметки се зголемил за 18%, а вкупниот износ на трансакции е поголем за 15%.

Покрај седмичниот бојкот, вчера 7-ми февруари беше трет последователен петок во кој граѓаните беа повикани да се воздржат од секаков вид плаќања.

Во текот на вчерашниот ден стапи на сила и одлуката на хрватската влада за директни мерки за контрола на цените на одредени производи и категории на производи во трговијата на мало, со која е утврден список од 70 производи со ограничени цени, а оваа мерка има цел да помогне во заштитата на граѓаните од високите цени во продавниците.

Претходниот список, кој беше формиран во септември 2023 година, содржеше 30 производи, а сега ги има 70. За новите 40 производи, трговците се обврзани да обезбедат најмалку еден вид артикал од иста категорија производи по највисока утврдена цена. Кога одреден производ е исцрпен, обврска на трговецот е да наведе друг по ограничена цена.