Уште еднаш апелирам СДСМ да се држи до словото и до духот на својата неодамна донесена декларација. Јас ќе бидам трпелив, но не предолго. А и многу други луѓе полека го губат трпението.

Објавил: Перо Милчин | 30 јули, 2019 19:26

Героски ОТКРИВА: “Невладина организација е искористена како покритие за активностите на Боки 13-ка„

Фото/Текст извор: ©плус инфо

Сѐ повеќе и сѐ погласно се зборува дека невладината организација на Бојан Јовановски, осомничен во аферата „Рекет“, Меѓународен сојуз, неизбежно мора да биде опфатена со истрагата за делата за кои е осомничен Јовановски – рекет, изнудување и перење пари. Моите сознанија, што ќе ги пласирам во овој напис, се дека оваа невладина организација е искористена како покритие за активностите за кои е осомничен популарниот Боки 13-ка.

Во овој текст нема да има псевдоними и измислени имиња. Напоменувам дека како и до сега, така и во овој момент сѐ уште, ниту еден од личностите што ги именувам не ги доведувам во врска со измислените ликови Коки, Фрики, Кики и другите, од моите поранешни фикциски, а сепак вистинити приказни. Нагласувам дека секое самопрепознавање или препознавање е лична одговорност на оние што ќе се самопрепознаат или ќе доведат во врска некои од ликовите за кои пишувам во овој текст со псевдонимите од моите поранешни приказни.
НВО со тешка „артилериска“ поддршка

Ако ги прочита човек целите на Меѓународниот сојуз на нивниот веб-сајт, кој сѐ уште е активен, ќе рече – ништо посебно. Има многу невладини организации кои се занимаваат со општествено најранливите и маргинализирани групи граѓани: децата на улица, бездомниците, граѓаните кои живеат во исклучителен социјален ризик и сиромаштија.

Но, Меѓународен сојуз на Бојан Јовановски, сепак, не е обична НВО. Таа веднаш стартува со „тешка артилерија“ како поддршка, вклучувајќи ја и потпретседателката на Сојузот, Фросина Ременски, која сега е и потпретседателка на парламентот.
Погледнете го видеото од основачкото собрание на Меѓународниот сојуз и ќе сфатите каква е оваа невладина организација:

Или, погледнете ја оваа фотографија, за да сфатите како е третиран Боки 13-ка од нашата владејачка елита:

Меѓународен сојуз на Бојан Јовановски, сепак, не е обична НВО. Таа веднаш стартува со „тешка артилерија“ како поддршка, вклучувајќи ја и потпретседателката на Сојузот, Фросина Ременски, која сега е и потпретседателка на парламентот.

Една од најважните „платформи“ со кои се занимава Меѓународниот сојуз на Бојан Јовановски е изградба на т.н. европски центри за возрасни лица и мобилни сервиси на териториите на македонските општини. На прв поглед, идејата е благородна, но изведбата, што ќе ја прикажеме низ договорот на НВО на Јовановски со градежното претпријатие „Пелистер“ од Битола на Силјан Мицевски, е основа за едно многу силно сомневање дека станува збор за зделки склучени со цел да се исперат пари и ништо повеќе од тоа. Секако, ја оставам можноста и Силјан Мицевски, иако искусен стопанственик, да тврди (како и специјалната обвинителка во оставка, Катица Јанева) дека бил злоупотребен во оваа зделка. Или дури и дека му се изнудени пари. Јас би му поверувал, но таа работа треба да ја утврди обвинителката Вилма Русковска.
Поседувам фотографии од тој чуден договор меѓу Меѓународен сојуз и ГП „Пелистер“, а верувам дека оригиналот го има и обвинителката Русковска.

Точниот назив на тој документ е „Преддоговор за стратешко партнерство и деловна соработка“. Договорни страни се Меѓународен сојуз – Скопје, застапуван од Бојан Јовановски и Друштво за градежништво и услуги „Пелистер“ Битола ДОО, застапувано од Силјан Мицевски. Договорот е склучен на 13.12.2017 година, печатиран и потпишан. Предмет на договорот е „платформата“ Европски комплекс за возрасни лица и мобилен сервис на територија на Општина Охрид и Европски центар за стари лица и мобилен сервис на територија на Општина Битола.

Како автор на проектот се јавува извесна госпоѓа Лилјана Тодоровска од Скопје, која сите договорни права наводно му ги пренела на Меѓународниот сојуз (така се вели во преддоговорот, но нема доказ за тоа).

Меѓународниот сојуз на Боки 13-ка се обврзал на ГП „Пелистер“ да му обезбеди државно градежно земјиште на територијата на општина Охрид, лоцирано на охридско крајбрежје, врз база на „наменски меморандум за соработка со општина Охрид“. Не знам дали постои таков меморандум, но истрагата треба да се распраша. Парцелата требало да биде со површина од 25.000 до 35.000 квадрати. Не ми е познато дали е обезбедена таа парцела и како завршила зделката што се однесува до Охрид. Но, најинтерсниот дел од договорот се однесува на Битола…
Боки на Силјан решение за градба, за возврат пари на име хонорар!
Двете страни се договориле Европскиот центар за стари лица во Битола да биде изграден од страна на ГП „Пелистер“, на приватно градежно земјиште, всушност на земјиште кое е во сопственост на „Пелистер“. Меѓународниот сојуз, меѓу другото, се обврзал на „Пелистер“ да му ја обезбеди целата потребна документација за почеток на градбата, вклучувајќи и правосилно Одобрение за градба кое ќе гласи на име на фирмата на Силјан Мицевски.
Градежната фирма на Мицевски се обврзала да ги плати трошоците за проектната документација. Но, тоа се малите пари. НВО на Бојан Јовановски, пак, се обврзал да обезбеди дури и субвенционирање од страна на државата на нивниот проект. Замислете каква поддршка и сила имал Боки 13-ка, кога се осмелил во договор да се обврзе дека ќе обезбеди државни субвенции за својот проект!
Но, човек ќе рече – зошто пак да не?! Идејата е убава. Боки 13-ка предлага, а Силјан Мицевски гради старски домови. Личи на нормален договор меѓу една невладина организација и една градежна компанија. Камо да е така… И сега, доаѓа најинтересниот дел од договорот. Имено, „заради регулирање на правата кои произлегуваат од платформата“, двете договорни страни се договориле ГП „Пелистер“ на Меѓународен сојуз да му уплати 1.439.810 евра, ама не директно, туку преку – Македонската авторска агенција?! Замислете, како авторски хонорар!
Во договорот пишува дека половината од оваа сума или точно 719.905 евра (плус персонален данок) требало да биде исплатена на денот на потпишувањето на договорот (13.12.2017 година), а вториот дел на денот на издавањето на правосилното одобрение за градба. Прашувам јавно, дали е тоа онаа сума од околу 750.000 евра рекет во Битола, за која пишуваше колегата Миомир Серафимовиќ од Телма? Оние 750.000 кои ги добила некоја постара жена, па ги подигнала и потоа и платила персонален данок?
И секако, прашувам, дали е тоа онаа зделка за која е вршен притисок врз битолската градоначалничка Наташа Петровска, која веќе даде исказ во истрагата? Според моите сознанија, станува збор токму за таа зделка. Моите извори велат дека Петровска не поткелкнала и не дозволила работата да дојде до правосилно одобрение за градба, што би значело делка вториот дел од сумата не е ни исплатен.
Боки бара интервенција од градоначалничката на Битола
Консултирав правни експерти и тие ме убедуваат дека договорот меѓу Меѓународен сојуз Скопје и „Пелистер“ од Битола правно е спорен, а веројатно и ништовен, поради неисполнување на три основи од Законот за облигациони односи. Прво, ни Бојан Јовановски ни Силјан Мицевски немаат обезбедено локација за градба. За договорот да може да се изврши, а правата за центарот за стари лица да припаднат од едната на другата договорна страна после период од пет години, прво требало да се уреди локацијата, којашто опфаќа дел и од битолската касарна и е под владение на Општина Битола. Согласно урбанистичкиот план на Битола, пак, таму не е предвидена изградба на деловни или станбени објекти. Второ, не е прикажана соодветна документација дека Меѓународен сојуз ги има преземено сите права од лицето кое што ги има заштитено правата за таков тип на комплекс, со такво име. Тоа е госпоѓата Лилјана Тодоровска од Скопје. И трето, веројатно најспорно, нешто што најмногу мириса на класично перење пари, е фактот што НВО на Бојан Јовановски не ги прима парите од „Пелистер“ на сопствената сметка, туку на сметка на правното лице Македонска авторска агенција – Скопје, од каде што парите ги подигнува Лилјана Тодоровска, која воопшто не е договорна страна. Дополнително прашање е каде завршиле тие пари. На која сметка? Кај Боки 13-ка? Кај некој друг?
Поседувам фотографија од допис од Меѓународен сојуз – Скопје, од 16.05.2018 година, како поддршка на барање на ГП „Пелистер“. Потпишан е Бојан Јовановски. Тој се обраќа до градоначалничката на општина Битола и до соодветните општински служби, со барање за интервенција за обезбедување нова локација за изградба на проектот во Битола од страна на ГП „Пелистер“, и тоа на градежната парцела 12.68 во АРМ Четврт 2, во „Касарна“ Битола. Од општината се бара парцелата да се пренамени со намена Б5 – изградба на хотелски комплекси. Парцелата има 14.518 квадрати, а планирано било да се изградат бруто 71.776 квадрати.
Во својот допис, пак, ГП „Пелистер“ напоменува дека парцелата треба да се третира како хотел или одморалиште, за да не мора да се прави промена на Деталниот урбанистички план. Тука се гледа опасноста – промената на ДУП е долга и опасна процедура. Па се барало таа некако да се избегне. Да повторам, моите сознанија се дека за оваа работа е одржана средба меѓу Бојан Јовановски и градоначалничката Петровска (не сум сигурен дали бил присутен Силјан Мицевски), а контактот меѓу страните го направил Александар Кирацовски, тогаш генерален секретар на СДСМ. Моите извори велат дека Петровска сепак одбила да постапи според барањето на Јовановски и на Мицевски, без да се усвои промена на урбанистичкиот план. Дали било така, ќе се види од истрагата.
„Дрим билдинг“ од Струга си ги бара парите назад!
Меѓународниот сојуз склучил уште еден ваков договор, со струшката фирма „Дрим Билдинг“. Поседувам фотографија од допис од „Дрим билдинг“ увоз-извоз Струга, во кој Меѓународен сојуз на Јовановски се потсетува на договорот, односно на делот во кој се вели дека „ако прводоговорната страна во предвидениот рок не ја обезбеди потребната документација, како и правосилно Решение за градба и Решение од ослободување на надоместок за уредување на градежно земјиште, должна е на втородговорната страна да ѝ ги врати уплатените средства во висина од 231.281 евра“. Во дописот се додава: „Наведениот износ бил исплатен преку Македонската авторска агенција, по издадена фактура број 11/18 од 02.01.2018 година, во корист на Јасна Мандиќ – координатор на проектот Европски комплекс за возрасни лица и Мобилен сервис на територијата на општина Карпош“.
Пак истата шема, но сега нов лик и нова општина. Јас мислев дека договорот исто така е за локација во Охрид, а овде се вели дека парите ги зела извесна Јасна Мандиќ, координаторка за општината Карпош. Значи ли тоа дека градоначалникот Стефан Богоев, иако пријател на Јовановски, сепак постапил како и неговата битолска колешка и одбил да влезе во шемата? Се надевам дека е така. Зашто, во дописот се вели: „Поради неисплатените обврски, Дрим билдинг, застапуван од полномошникот Ардијан Амзоски, од Меѓународниот сојуз, застапуван од Бојан Јовановски (претседател), од Агапи Дика (претседател на Собрание), Јованка Кухар (координатор на проектни активности), Лидија Тодоровска (автор на проектот) и Јасна Мандиќ (координатор на проектот) си ги бара парите назад“. Дознавам дека парите сѐ уште не се вратени во целост и дека можеби се враќаат на рати. Сега, кога Јовановски е во притвор, кој знае дали воопшто се враќаат…
Не било лесно да се одбие фамозниот Бојан Јовановски. Ова го дознавам од еден друг допис, од сопственикот на една навистина моќна македонска градежна компанија. Поседувам фотографија и од овој допис. Сопственикот е толку моќен и со силен грб, што се вели, што смогнал сили да го одбие безобразниот Јовановски со неговата „платформа“. Но, прочитајте го јазикот со кој газадата на оваа градежна компанија внимателно се вади пред семоќниот Боки 13-ка:
„Цениме дека може да биде интересен проект и партнерство, но како бизнис ориентирана компанија… бла, бла, бла“. Тука се објаснува дека компанијата веќе влегла во сличен проект. И понатаму, во дописот до Боки: „Од овие причини, би ценеле доколку имате разбирање и со конечни одлуки и договори продолжиме на крајот на 2017 за реализација во 2018 година, до кога ќе ги имаме сите параметри усвоено и сите потребни ресурсни сознанија“. Газдата под рекет очигледно купува време.

На крајот на одговорот, се изразува „надеж“ дека „ќе биде разбрана претпазливоста на компанијата“, бидејќи во проектот на Меѓународен сојуз таа требало да вложи десетина милиони евра сопствени средства.
Замислете, десеттина милиони евра сопствени средства! Високо пукал Бојан Јовановски. Што му дало таква сила? Па, погледнете го составот на водечките тела на Меѓународен сојуз. Погледнете ја добро уште еднаш онаа фотографија. На сите кои стапувале во контакт со Боки 13-ка им било јасно дека разговараат со моќен човек.

И веројатно им било јасно дека зад него стојат други, помоќни од него. Како специјалната јавна обвинителка Катица Јанева, на пример, која сега се вади со приказната дека била злоупотребена. А никој нормален веќе не може да разбере зошто и таа, која „брилјира“ на спикерфонот на снимката кај сведокот, кога се даваат изнудени пари, не е опфатена со истрагата. До кога ќе се штити Катица Јанева? Зошто? За да не проговори за нешто?
Трпението има крај, молкот не е добра опција
И тука морам повторно да им се навратам на моите измислени ликови, пак со напомена дека отфрлам било каква одговорност за себепрепознавања и препознавања. Се сеќавате на моите приказни за милионскиот рекетар Коки, за Кики и Фрики, за Лаки и за другите ликови што ги спомнав? Прво се исчудувавте, а откако пукнаа некои интересни афери во земјата, веќе ништо не ви беше така чудно, нели. За жал, премиерот Заев изјави дека не знае кои се Кики и Фрики, а тие не понесоа ни политичка одговорност, а ниту дадоа искази кај јавниот обвинител. Наместо тоа, премиерот мене ме упати да дадам исказ.
Добро, затоа во август, како што ветив, ако истрагата конечно не покаже вистински напредок, јас ќе давам „искази“ јавно, односно ќе продолжам со приказните и ќе ви кажам кој сѐ стои зад Коки и со кого соработувал. Секој што е паметен знае дека никој, па ни Коки, не може да е толку моќен да обезбеди заштита за сите лица со кои соработувал, ако тие и без него не се поврзани со државниот врв. Така, на пример, една од клучните личности во најблиската околина на Коки е една дама, за која се знае дека е јатрва на една наша многу моќна и позната политичарка. Тоа е само еден детал за она што треба да се открие и – ќе се открие.
Да се вратам, за крај, од фикцијата, повторно во реалноста. Навистина не би сакал јас да бидам тој што ќе ја расплетува веројатно најголемата афера што ги тресе оваа влада и нејзиниот премиер. СДСМ декларираше спремност за борба против корупцијата. Очекувам сите видни членови на СДСМ кои имале врска со невладината организација на Бојан Јовановски и со неговиот медиум, како и со него приватно, да се изјаснат, да дадат јавни искази, а ако е потребно и искази кај јавниот обвинител. Треба сите да си ги исчистат имињата. Тие што можат. Не верувам дека баш сите биле со умисла вплеткани во шемите на Боки 13-ка, иако сѐ уште не разбирам како воопшто фатиле работа со еден таков човек.
Можно е некои да биле злоупотребени, не велам не. Но, овој молк е опасен. Овој обид аферата да се сведе на двајцата осомничени е еклатантно прикривање на високата корупција. А тоа нема да помине. Веќе не сум сам. Нѐ има повеќе што нема да дозволиме овој страшен скандал да се разводени, без да се плати политичката цена за таквиот обид. А нема потреба да биде така.

Затоа, уште еднаш апелирам СДСМ да се држи до словото и до духот на својата неодамна донесена декларација. Јас ќе бидам трпелив, но не предолго. А и многу други луѓе полека го губат трпението.

»Вестите на порталот MAGAZIN.MK може да се користат исклучиво за лично информирање. Без писмена дозвола од порталот или посебен договор, не е дозволено превземање, користење или реемитување на вестите, во спротивно ќе следи фактурирање на име "плагијат" во вредност од 20.000 денари.

Останати вести од Колумна

Но, фер е да се каже дека во тие години, на некој начин, водев и „двоен живот“. Во гимназиските денови цел еден четиригодишен мандат бев секретар на младинската организација на општината Карпош.

Героски ја отвори душата: Можев да станам космонаут, ама не сакав

Роден сум во 1962 година во Гостивар, Македонија. Датумот на моето раѓање, 2 февруари,...

Героски, од кого почна пишувањето за Рекет, по консултации со правни експерти бара замрзнување на сите предмети кои ги водело СЈО.

„СЈО ќе остане запаметено како Голи Оток на генералот Капичиќ кого го славеа како Катица пред два месеци„

Да, се согласувам дека нема правда во обвинителствата и судовите но, дочекавме космичка...

Дека во кругот околу премиерот се случува тотален хаос знаеме уште од мај годинава.

Момироски: Зошто за нападите на владините медиумски јуришници врз Героски молчат Роберт Поповски и Ордановски

Слонот во македонската стаклена продавница лоцирана на улицата Илинденска но и на...