Неодамна избраниот градоначалник беше застрелан и убиен вчера во јужниот дел на Мексико, во државата Гереро, соопштија локалните власти.

Салвадор Вилалва Флорес победи на локалните избори на 2 јуни и во октомври требаше да ја преземе функцијата градоначалник на Копала, град со околу 4.000 жители, пренесува Индекс. Гереро е една од сојузните држави најмногу погодени од насилството на наркокартелите, со оглед на нејзината локација долж брегот на Мексико во Пацификот. Минатата година во таа сојузна држава се регистрирани 1.890 убиства.

Локалниот весник „Ел Сур де Гереро“ објави дека Вилалва бил пензиониран капетан на морнарицата кој обично бил заштитен од Националната гарда, но сега патувал сам во Мексико Сити.

„Новоизбраниот градоначалник беше изваден од автобусот со кој се движеше и беше застрелан“, пишува весникот.

Обвинителите потврдија дека е покрената истрага за убиство, но одбија да дадат дополнителни детали. Локалните медиуми објавија и дека Вилалва одлучил да се кандидира за градоначалник откако неговиот пријател кој решил да се кандидира на изборите бил убиен во јуни минатата година.

На општите избори во Мексико на 2 јуни, левичарката Клаудија Шејнбаум беше избрана со големо мнозинство за прва жена во земјата. Покрај изборот на нов претседател, Мексиканците гласаа за членови на Конгресот, неколку државни гувернери и безброј локални функционери. Кандидатите се натпреваруваа за повеќе од 20.000 позиции.

Најмалку 34 политички кандидати биле убиени низ Мексико пред и по изборите, според групата за човекови права Data Civica.