Советот на Град Скопје на седница во својство на Собрание на акционерите го усвои статутот на Акционерското друштво за енергетски дејности и ги избра членовите на Надзорниот одбор на новото јавно претпријатие, кои понатаму ќе изберат управен одбор од пет члена. Ова акционерско друштво за подрачјето на Град Скопје ќе врши снабдување со природен гас и топлинска енергија како дејности од јавен интерес од локално значење.

Од Град Скопје велат дека со ова се создаваат услови за преземање на топловодната мрежа и започнува да се имплементира процесот на гасификација на градот, во кој граѓаните на Скопје во претстојната грејна сезона ќе може да почнат да ги користат услугите на новото јавно претпријатие.