Немало законски начин како да им се даде отказ на т.н. рамковни вработени, ако одбијат работа во некоја од институциите. И покрај тоа што 1.350 луѓе со години земаат државна плата, а седат дома, не можат да бидат избркани – потенцира вицепремиерот Артан Груби за Алфа!

Непосредно пред напуштањето на функцијата, тогашниот министер за администрација Дамјан Манчевски рече дека за 3 месеци ќе се најде решение за овие луѓе, а ако тие не сакаат конечно да тргнат на работа, ќе им бидат прекинати договорите.

Сега Груби тврди дека треба да се донесе посебен закон за оваа категорија административци.

„Нема законска можност за тоа да се реализира, за жал. Во некои од институциите самите вработени не сакаат да одат, во некои други случаи, институциите не ги прифаќаат затоа што би преферирале нови вработувања. Затоа и најавив усвојување можеби на посебен, специјален закон, само за оваа категорија, со кој би било обврзувачки, и институцијата и вработениот да го прифатат распределувањето“ – вели Груби.

Рамковните седеле дома, но не по нивна вина – вели Груби и покрај тоа што признава дека тие одбиваат работа. Некои од нив не ги примале ниту институциите. Процесот бил почнат, но не сакаше да каже кога ќе заврши. Неблагодарно било да се даваат крајни рокови за финиш на овој долгогодишен процес.

„Неблагодарно е да зборуваме за рокови, 2, 3, 5, 6 месеци, но е апсолутен приоритет на Владата. Го има во владината програма, во нашата партиска програма и з амене претставува приоритет распределување на тие што земаат плата, а седат дома, не по нивна вина“ – вели Груби..

Груби истакна дека ќе се залагал да нема нови вработувања во администрацијата, се додека не се решат рамковните. Сепак, ситуацијата на терен е поинаква. Секојдневно има огласи за ангажирање на нови кадри. Последното истражување на Центарот за граѓански комуникации покажа дека вработувањата во министерствата се зголемиле за 3% во последните три години или за 540 луѓе.