Судскиот процес во кој обвинет е Шекерим Ахмеди, на социјалните мрежи познат како „Ел Чека“, конечно почна и речиси дојде до крајот, објави „Плусинфо“.

Денеска во судот во Кичево се одржа првото рочиште, откако претходно две беа одложени. Како што велат од судот за Плусинфо, и обвинителството и одбраната ги изнеле и презентирале доказите на денешната главна расправа, па останале само завршните зборови.

Било планирано и со нив да се заврши денеска, но на барање на адвокатот на Ел Чека за да може да се подготви, завршни зборови и тој и обвинителството ќе дадат на 21 октомври.

Потоа ќе остане само кичевскиот суд да ја соопшти пресудата.

Ел Чека се товари за кривичното дело неовластено прислушување и тонско снимање.

За потсетување, лицето кое што објавува нови „бомби“ преку профил на Фејсбук кое веќе стана добро познато во јавноста, како „Ел Чека“ е по потекло од кичевско.

„Бомбите“ ги објавува од Чикаго, САД, а тврди дека нелегалните прислушувани материјали му ги дале членови на т.н. Кумановска група, чии членови се осудени за настаните во Диво насеље, а сега се во затвор.

Симпатизер на УЧК и активист за правата на Албанците

Доколку се разгледа профилот на Фејсбук, „Ел Чека“, чиј број на „пријатели“ секојдневно расте, ќе се забележат и фотографии од припадници на УЧК, но и фотографии кои покажуваат дека е активист за правата на Албанците.

Сам си го откри ликот

Иако МВР соопшти дека им е познат неговиот идентитет, лицето продолжи со објавување на нови „бомби“, а за сега овој профил на Фејсбук успешно функционира, иако македонските институции соопштија дека е пријавен во централата на социјалната мрежа.

Објавувачот си го покажа и ликот, преку најразлични фотографии и секојдневни вклучувања во живо на профилот „Ел Чека“.