Актуелниот европски првак делуваше уште некомпонирано и невоиграно и единствениот период во кој имаше иницијатива беа почетните 15-тина минути.

Вардар водеше со 6-3, подоцна и со 7-4, но оттука почна налетот на Е. Пелистер. Прво изедначи на 8-8, а потоа таа серија ја протегна до девет постигнати, а само два примени гола, па во последните десетина минути имаше водство од 11-9. Вардар, сепак, не дозволи да замине на пауза со негатива и стигна до 13-13 на крајот од првиот полчас.

Во вториот, Е. Пелистер беше подобар тим уште од стартот. Веднаш наметна водство, а Вардар се соочи со расположениот Градимир Чаневски, кој нанижа четири интервенции, токму во периодот кога неговиот тим градеше предност. Таа достигна максимални плус пет (23-18) во 48. минута, а Вардар не покажуваше знаци дека може да се врати, со оглед дека многу често грешеше во нападот.

На крајот на натпреварот се појавија и искри, колку да се види дека, иако е само подготвителен турнир, во македонскиот ракомет допрва ќе има ривалство. По еден дуел на Кушан и Талески, се вклучија сите ракометари на паркетот, а епилогот беше црвен картон за македонскиот репрезентативен лев бек и син за Столе Стоилов, кој се обиде да разделува.

Ова е триумф број 12 на турнирот за Е. Пелистер, прв откако ја има додавката Еурофарм на своето име, а 12 има и Вардар, па сега двајцата го делат епитетот најтрофејни.