Четворица полициски службеници се повикани на распит во Обвинителството за организиран криминал и корупција, потврдија од МВР. Неофицијално, полицајците се повикани да дадат исказ под сомнение дека оддавале тајни податоци, прибавени од посебни истражни мерки.

Според одредени информации станува збор и за нелегалното објавување на снимката во врска со случајот „Поткуп“, во кој, наводно, е вмешан лидерот на СДСМ, Зоран Заев.

Од Јавното обвинителство не потврдуваат за какво дело станува збор и велат дека се работи за предистражна постапка и дека полициските службеници се приведени на разговор, а не се уапсени. По информациите дека полиските службеници се наводно од тимот на Наќе Чулев, а вработени во Бирото за јавна безбедност техничкиот министер за внатрешни работи се огласи со демант на својот фејсбук профил.

Министерот Чулев со ДЕМАНТ: Не се тоа луѓе од мојот тим!

„Станува збор за преземање службени дејства по наредба на судија за претходна постапка за лица кои се вработени во Министерството за внатрешни работи и истите се распоредени на соодветни работни места со решенија од претходните министри и никако не се поврзани со мојот тим или пак мојот кабинет. Лицата немаат добиено било какви решенија од моја страна“, напиша Чулев на својот фејсбук профил.

Во Кривичниот суд во Скопје се води процесот „Поткуп“, во кој обвинет е лидерот на СДСМ, Зоран Заев.

По кривична пријава од Министерството за внатрешни работи, Обвинителството за гонење на организиран криминал и корупција во јуни 2015 година поднесе обвинителен акт против Заев.

Заев, според Обвинителството, во својство на службено лице градоначалник на Општина Струмица, од струмичкиот бизнисмен Иван Николов побарал поткуп од 163 924 евра, односно по 2 евра за еден метар квадратен градежно земјиште во Струмица кое Николов бил заинтересиран да го приватизира. Според обвинението, едната половина од партите била за Заев, а другата за изградба на црква во Струмица.

На рочиштето за оцена на обвинителниот акт, што се одржа во јули 2015 година, одбраната го оцени обвинението како контрадикторно, правно неиздржано и тенденциозно.

„За да стане збор за обвинение за поткуп, треба да биде примен подарок. Одземањето на корисничкото право на користењето на градежното изградено земјиште не е дејствие што е во рамките на службените овластувања на Заев како градоначалник, туку е во надлежност на Министерството за финансии, односно на Управата за имотно-правни работи. Очигледно е дека при поднесувањето на обвинението имало тенденција осомничениот да се товари за што потешка правна квалификација“, рече адвокатот Филип Медарски.

Застапник на обвинението беше јавниот обвинител Владимир Милошевски, кој сметаше дека постојат доволно докази за Судот да донесе осудителна пресуда за Заев.

На 21 Мај 2018 година откако Заев Зоран постана  премиер тој беше ослободен од обвинението за „поткуп„.