Државните болници остануваат без лекари. Дека Македонија се соочува со алармантен одлив на медицински кадар е веќе познато, но она што загрижува е што тој тренд продолжува.

Според податоците на Македонското лекарско друштво околу 250 доктори годишно заминуваат од земјава и го напуштаат јавното здравство.

„Бројката којашто во деведесетите години била 18.000 сега се движи помеѓу шест и седум илјади лекари коишто се медицински доктори, притоа тука не ги вбројуваме фармацевтите и стоматолозите. Од професионална гледна точка јас мислам дека треба да се направи добра регионализација, да се обезбедат подобри услови за специјализација, брзо вработување, уште додека учат студентите по медицина и да се почитува напредокот и визијата што ја имаат младите луѓе во земјава“ – вели Д-р Горан Димитров претседател на Македонско лекарско друштво.

За младите лекари најважно е системот да обезбеди достоинствени услови за работа, пристојни плати, но и можност за надградба и напредок во кариерата.

Леонид Караџинов е најдобриот студент по медицина во неговата генерација. Моментално е на пракса во службата за брза помош, а за разлика од многу други негови колеги, иднината барем засега ја гледа во државава. Сепак вели свесен е дека претстои голема борба заедно со еснафските здруженија за подобрување на условите за оваа фела.

„Клучното е да имаме сигурност особено важна е финансиската сигурност, покачување на платите, безбедносна и финансиска сигурност“ – вели Караџинов.

Човечките ресурси се најважни порачаа и од Светската здравствена организација.

„Тоа е од исклучителна важност затоа што без лекари и без медицински сестри не би можел да постои здравствен систем. Ние соработуваме со други земји, на пример со Словенија за зајакнување на сестринството затоа што тие би можеле да даваат поширок спектар на услуги од оној што сега го даваат“ – вели Ане Јохансенод СЗО.

И додека здравствените власти се фалат со инвестиции и покачувања на платите во здравството, само изминатиов месец на протести излегоа младите лекари коишто со месеци не се повикуваат на пракса во болниците, која им е услов да запишат специјализација.

По нив на протест излегоа и приватните специјализанти кои побараа повисоки плати, но и здравствено осигурување, а веќе за во понеделник закажани се протести и на Синдикатот на вработените со скопскиот клинички центар како и на синдикатот за здравство и фармација поради незадоволството од условите за работа.