По синоќешното свечено отворање на Музејот на христијанското и исламското културно наследство во Битола, стигнаа првите реакции.

ДУИ и Исламската верска заедница (ИВЗ) се огласија со реакции изразувајќи ја нивната „длабока загриженост’ откако Националната установа Завод и Музеј Битола синоќа во градот на конзулите го отвори Музејот на христијанското и исламското културно наследство во Јени џамијата, под која беа откриени и темели на црквата „Св. Ѓорѓи“.

Тоа е и еден од проектите со кои НУ Завод и Музеј Битола го одбележува својот јубилеј – 90 години од формирањето.

Директорка на Комисијата за односи со верските заедници и религиозни групи, Оливера Трајковска, на вечерашното отворање потенцира дека Музејот на христијанско и исламско културно наследство е спој на она што сите треба да го прават во секојдневниот живот – да се спојат преку љубовта, преку молитвата, преку соживотот.

„Јени џамијата и црквата „Св. Ѓорги“ од денеска се Музеј на христијанско и исламско културно наследство. Сите ние како луѓе сме верници без оглед на тоа на кој јазик го молиме Бога, без оглед на тоа со кој збор го ословуваме Бог, дали како Алах или како Господ Исус Христос…Всушност сите ние веруваме и како верници треба да бидеме љубов. Под напливот на глобалистичките трендови со кои што некој се обидува да не раздели и да посее семе на омраза, ние треба да застанеме и да кажеме – не, ширејќи љубов“, посочила директорка на Комисијата за односи со верските заедници и религиозни групи при синоќешното отворање на Музејот на христијанско и исламско културно наследство во Битола.

Исламската верска заедница (ИВЗ) испрати реакција до премиерот Христијан Мицкоски, министерот за култура и туризам Зоран Љутков и дипломатските преставништва во земјава искажувајќи длабока загриженост по синоќешното отворање на Јени џамија во Битола како Музеј на христијанско и исламско културно наследство. За нив е неприфатливо да не се консултура ИВЗ за оваа иницијатива, нити да се бара согласност за нејзината трансформација.

„Џамијата била изградена во 1558 за време на отоманскиот период. Во времето на комунизмот, државата ја заплени и ја претвори најпрво во магацин, а потоа во уметничка галерија. ИВЗ бараше да им биде денационализирана и да се користи од страна на верниците како место за богослужба. Но, државата, поточно Министерството за култура, никогаш не го исполнија ова наше легитимно барање и со години ја држеа затворена, а сега ја трансформираа во Музеј без согласност на ИВЗ“, пишува во нивната реакција.

По синоќешното отворање на Музејот, се огласи ИВЗ, но и ДУИ.

„Демократската унија за интеграција ја изразува својата длабока загриженост поради последната одлука на Владата за активирање на статусот на Јени Џамија во Битола како галерија, занемарувајќи ги верските и историските чувства на една важна заедница во државата“, се наведува во синоќешната реакција од Мала Речица.

„Овој чин, кој продолжува со логиката на еднострани одлуки, е јасен показател за континуираната институционална, етничка и верска деградација што ја карактеризира оваа Влада (…) Во овој контекст, ДУИ ги осудува политиките на Владата што имаат за цел рушење на темелите на еднаквоста и соживотот, претворајќи ги овие теми во политички алатки за поделби“, се наведува во реакцијата на ДУИ.