Македонија ги елиминира европскиот првак Италија среде Палермо и дојде само на еден чекор до мундијалот во Катар.

Фудбалерите се спортистите кои во последниот период ја радуваат нацијата, а вчера вечер ја фрлија во транс цела Македонија.

Селекторот Благоја Милевски ја забележа најголемата победа како кормилар на сениорскиот тим откако Македонија славеше на гости кај Италија (0-1) и продолжи во финалето во битката за СП 2022 во Катар.

Триумфот го донесе Александар Трајковски. Милевски емотивно заедно со останатите играчи го прослави големиот успех, а има и две причини за радост. Првата е секако победата над Италија, а втората е дека денес (25 март) му е роденден!

Благоја Милевски е роден во 1971 година во Скопје. Полни 51 година, баш заедно со победата над Италија. Селекторе, среќен нека е и само успеси со Македонија!

Честитки за големата победа на Македонија кај Италија(0-1) доаѓаат од сите страни, а меѓу нив е и онаа на највисокиот државен функционер, претседателот на земјата, Стево Пендаровски.

Пендаровски често можеме да го видиме на фудбалските натпревари кои ги игра Македонија, а сега реши да се пошегува на социјалната мрежа „Твитер“. Првиот човек на државата објави фотографија од радоста на Македонија и заедно со неа напиша„Подготви се Кристијано, ти си следен!“.