По човек со средно градежно како в.д., а откако го сменија виртуозот Џорлев, СДСМ за директор на оваа еминентна институција со нов предлог

Објавил: Мирко Бачиќ | 2 септември, 2018 7:33

Мартин Вучиќ нов директор на “Танец”

Фото/Текст извор: ©магазин.мк

Националната установа за народни игри и песни ансамбл „Танец“ добива нов директор.

Како најсериозен кандидат за оваа функција се споменува музичарот и перкусионист Мартин Вучиќ. Мартин потврдува дека постои можност да застане на чело на институцијата, но додава дека се уште е рано да се коментира на темава зашто ништо не е дефинитивно.

– Јас се пријавив на конкурсот, но резултатите ќе се знаат од понеделник. Министерството ќе ги соопшти, па рано е да коментирам било што – изјави Вучиќ.

Триесет и шест годишниот Вучиќ се занимава со музика уште од најрана возраст. Тој е во музичко семејство, син е на музичарот и ТВ водител Драган Вучиќ и на Весна, ќерка на легендарниот Пеце Атанасовски, изведувач, аранжер и композитор на македонски фолклорни песни. 

Интересно е што двајцата дедовци на Мартин своевремени биле дел од овој Ансамбл. Пеце Атанасовски е еден од доајените на „Танец“, кој бил кореограф и играорец и Милорад Вучиќ, кој 15 години бил шеф на оркестарот на „Танец“.

Тој ја претставуваше Македонија на Евровизија во Киев во 2005 година, сними повеќе хитови, а денес е дел од Македонската Филхармонија.

Околу веста дека Вучиќ е можниот нов директор на националниот ансамбл, повеќето вработени во „Танец“ коментираат дека станува збор за компетентна личност, со одлично музичко познавање и искуство, но и соодветно образование. Според нив, токму личност од неговиот калибар е она што и потребно на институцијата која ги претставува традицијата и фолклорот на нашата земја.

Лани „Танец“ се најде во центарот на вниманието на јавноста, кога беше сменет директорот Зоран Џорлев и за в.д. директор беше поставен Стојанче Павловски. Вработени во институцијата реагираа дека Павловски е човек со средно градежно училиште и не е вистинската личност за функцијата.

»Вестите на порталот MAGAZIN.MK може да се користат исклучиво за лично информирање. Без писмена дозвола од порталот или посебен договор, не е дозволено превземање, користење или реемитување на вестите, во спротивно ќе следи фактурирање на име "плагијат" во вредност од 20.000 денари.

Останати вести од Култура