Кризата навлегува секој ден сè подлабоко во џебот на граѓаните, а власта планира со антикризни мерки да и застане на патот, но од ноември.

Првите мерки за заштита од ценовни шокови, ќе бидат насочени кон граѓаните, а не кон трговците, истакна денес вицепремиерот Битиќи и порача дека нема да се дозволи трговците да се договораат за повисоки цени.

Владата со ребалансот издвои 74 милиони евра за деветтиот пакет антикризни мерки, но што точно ќе содржи овој пакет засега во јавноста никој не знае. Она што е познато е дека ќе бидат поддржани најпогодените категории, па оттука се отвора прашањето дали ќе има замрзнување на цени и ограничени маржи, или пак ќе биде само ограничена помош за одредена категорија на граѓани?

Според податоците на Државниот завод за статистика, пак едно четиричлено семејство за да го помине месецот му се потребни приближно 50 илјади денари, од кои најголем дел, односно околу 20 илјади денари, одат само за храна и пијалоци.

И додека граѓаните секојдневно се соочуваат со поскапувања, а нивните месечни примања остануваат исти, надлежните си ја префрлаат топката еден на друг.