На шест месеци пред одржувањето на предвремените избори, довчерашниот потпретседател на ВМРО-ДПМНЕ вели дека нема амбиции да учествува на нив. „Имам премногу обврски како градоначалник на Кавадарци и сакам да го исполнам тоа што го ветив – градот да биде убаво и пристојно место за живеење“, вели Митко Јанчев за “Независен весник“. Неговото име се споменуваше во контекст на формирање нова политичка партија, во која би влегле и други поранешни членови на ВМРО-ДПМНЕ, како екс министерот Никола Тодоров, контраверзниот Сашо Мијалков, реформаторот Петар Богојески Бунтур кој и е советник на Шеќеринска и други личности на кои повеќе им се допаѓа работата на владата, отколку политиката на ВМРО-ДПМНЕ.

Митко Јанчев беше сменет од потпретседателското место во ВМРО-ДПМНЕ во време кога седум пратеници од оваа партија гласаа за смена на Уставот и за Преспанскиот договор. Разрешувањето беше објаснето со дејствување спротивно на интересите на ВМРО-ДПМНЕ и на Македонија, заради силна соработка со Зоран Заев, како и организирање на група за притисоци, уцени, закани и поткуп на пратеници од опозицијата да гласаат за уставните измени, при што биле користени најниски методи. Недоразбирањата на Јанчев со раководството на ВМРО-ДПМНЕ ескалираа кога тој, Сашо Мијалков, Петар Бунтур и Нино Тодоров јавно почнаа да агитираат за опцијата членовите на ВМРО да учествуваат на референдумот за смена на името, па макар и со гласање против. Сепак мнозинството членови на ВМРО-ДПМНЕ беше за бојкот на незаконскиот референдум за смена на името. Точно една година подоцна, градоначалникот на Кавадарци и натаму е член на ВМРО-ДПМНЕ, но и натаму е со истите ставови, пред сѐ кога е во прашање евтоинтеграцијата на нашата земја.

„Нема вистина во тоа. Во овој момент не размислувам за нова политичка партија“, дециден е Јанчев во изјавата за „Независен весник“. Тој не сака да го прогнозира исходот од престојните избори и најавите од неговата партија дека ќе извојуваат убедлива победа и ќе се вратат на власт. „Изборите се мерило и предизвик за секоја партија. Пред натпреварот, сите имаат шанса“, подвлекува Јанчев. Но, со самото тоа што градоначалникот Јанчев сега се пишмани во однос на идејата за нова партија изгледа како сигнал дека тој и неговата екипа не сакаат да му прават било какви пречки на ВМРО-ДПМНЕ во пресрет на изборите на кои партијата може да излезе како победник.