Наместо да бидат постојано и да ги обезбедуваат наплатните рампи цел ден како што било предвидено, обезбедувачите доаѓале само отсабајле во прва смена, а агенцијата наплаќала целосно.

Поради тоа првоосомничен е Џемал Билбилоски, сопственикот на агенцијата за обезбедување 2СС од Кичево која добила двегодишен тендер, а меѓу опфатените со истрага е и Ејуп Рустеми кој како поранешен директор на ЈП Државни патишта, не го контролирал извршувањето на обврските од договорот.

Договорот е потпишан во август 2022-ра на сума од околу 47 милиони денари односно околу 760 илјади евра- но не биле вршени сите обврски, поради што сопственикот Билбилоски е прв на листата осомничени.

-Иако согласно потпишаниот договорот бил должен, не се придржувал кон обврската и за целиот период од договорот вршел само делумно физичко обезбедување, најчесто само во прва смена,  а  на договорниот орган фактурирал услуги како да било вршено 24/7 физичко обезбедување  за целиот период на договорот се до неговото раскинување, соопштија од обвинителството и МВР.

Оосмничена е и фирмата, а покрај Рустеми и Билбилоски- осомничени се уште тројца раководители во Државни патишта затоа што нанеле штета од големи размери на Јавното претпријатие.

Државните службеници се осомничени за злоупотреба на службената положба и фалисфикување на исправи со кои биле реализирани наплатите, поради што истрагата е соочена со кратки рокови откако по измените на кривичниот законик- казните за функционерите со злоупотреба се намалија и ги скратија истрагите.

Компанијата 2СС беше ангажирана како  обезбедувањето во М-НАВ кога преклани се случи пресметка во кулата на летање.