Претседателката на Советот на Град Скопје, Љубица Јанчева, вчера на /16.09.2020 година/, се обрати на отворањето на конференцијата „Културниот туризам во афирмација на македонското културно наследство во Скопје и Скопско“, која се одржа пред црквата „Рождество на Пресвета Богородица“, во Скопје.

Целта на конференцијата е да ја поттикне актуелноста на современата улога и значење на културниот туризам како една од функционалните мобилни форми за афирмација, заштита и промоција на културното наследство во Скопје и Скопско.

– Поаѓајќи од тоа дека проследувањето на релацијата помеѓу културното наследство и културниот туризам е еден вид на приказна, која треба да се протолкува, афирмира и актуелизира, својот придонес на конференцијава ќе го дадам преку едно кусо раскажување на нашата градска институционална развојна приказна што треба да се слушне, а се однесува на активностите/делотворните акции што Град Скопје ги презема за афирмирањето на културното наследство и за развојот и зајакнувањето на културниот туризам.- нагласи Љубица Јанчева.

Таа додаде дека културното наследство и културниот туризам се во еден провокативен дослух, кој мора да биде следен и од будното око на Град Скопје, каде што струи и егзистира еден извондредно силен и моќно креативен дух, исполнет со една (работна) енергија – сконцентриран во Секторот за локален економски развој – Одделението за туризам, кој своите активности/делотворни акции ги насочува кон поттикнувањето на развојот, зајакнувањето и значењето на културниот туризам како една од функционалните форми за афирмација, заштита и промоција на културното наследство во Скопје и Скопско.

 Градот Скопје е богат со значајно културно наследство (споменици, комплекси и места), коешто може да го понуди и на домашниот и на меѓународниот туристички пазар, а Град Скопје грижливо води сметка за валоризацијата на културното наследство во правец на развивањето на културниот туризам. Од овие причини, Град Скопје и понатаму ќе поддржува вакви конференции, кои се од суштествено значење затоа што даваат и ќе даваат свој придонес и за афирмирањето на културното наследство, за развојот и за зајакнувањето на културниот туризам, како и за одржливиот развој на креативниот град – градот Скопје – резимираше Јанчева.

Конференцијата е во организација на Институтот за македонска литература и е поддржана од Град Скопје и од Министерството за култура.