Најмалку 20 луѓе загинаа синоќа откако автобус кој превезувал туристи слетал од надвозник во близина на Венеција на северот на Италија и се запалил, кажа градоначалникот на градот Луиџи Бруњаро.

Автобусот скршнал од патот и паднал во близина на железничка пруга во округот Местре, кој со мост е поврзан со Венеција. Причината за несреќата е сè уште непозната, пренесува Ројтерс.

Телевизијата Скај Италија јави дека 18 тела се извлечени од остатоците откако возилото слетало и се запалило.

„Тоа е апокалиптична сцена. Без зборови сум“, напиша градоначалникот на Венеција Луиџи Бруњаро на мрежата Икс (Твитер).

„Има најмалку 20 мртви, но некои луѓе сè уште се заробени во остатоците“, кажа Бруњаро подоцна за италијанската државна телевизија Раи.