Според етимолошката дефиниција, инфлуенсерство значи „влијание кое еден човек го има врз друг човек или друга група на луѓе“. Зборот води потекло од англискиот збор „influence“ и во буквален превод значи – влијание. Влијанието, пак е социо-психолошка категорија и ја означува моќта што поединец ја има врз предизвикувањето на псхички, физички или општествени промени кај другиот или кај другите. Во последните неколку години во литературата, но и во колоквијален контекст често ќе го сретнете зборот „инфлуенсерство или инфлуенсер“ во употреба. Но, како што на Балканот се добива поинаква димензија и се прекршува како сноб од светлина помешан со призмата на домицилните разбирања и вредности, така и овој збор го губи своето вистинско значење.

Светските инфлуенсери се политичари, новинари и луѓе кои се маркетинг експерти. Нивното влијание е резултат на добра подготовка, експертиза и пред се образование. Тие вршат влијание во поглед на разјаснување на проблемите, на предочување на реалноста и се стручни во нивните анализи и пристапи кон одредена тема. Во Македонија „инфлуенсерки“ се жени кои имаат по илјадници „лајкови“ на своите фотографии овјавени на социјалните мрежи, пред сè инстаграм. На нивните фотографии можете да видите деколте кое е во преден план, големи гради или евентуално испакнати задници. Ако фокусот на фотографијата е лицето на дотичната, тогаш во преден план се секако нејзините усни, кои ако не се силиконски се толку нацртани и надоградени да буквално изгледа како да „сисала весла“ цел ден. Баш од греота девојчево.
Инфлуенсерките не ретко ги користат своите Инстаграм профили за да ја прикажат убавината на животот. Нивните фотографии се направени на егзотични места, покрај мориња, се фотографираат на журки или во елитни ресторани каде што пијат скапи вина, или „Моет“. Во сите контексти „Моет“ се спомнува како врвот на нечиј успех. Луѓе се фалат дека пијат скапи алкохоли. Замислете како тоа изгледа, се фалиш дека пиеш алкохол кој е скап. Како ефтиниот да не те пијани доволно. Алкохол, ко алкохол, намената му е иста, да ти предизвика промена на свест. Златна прашина да има во „Моет“ луѓе кои ќе се опијанат од него ќе се понашаат идентично со оние кои ќе се опијанат од ракија. Ама од пијан човек и будала бега. Додека нашите инфлуенсерки се фалат со своите пијалоци и пијанства, нивните баби по дома се срамат од таквото однесување. Србите викаат „Од чега се паметан стиди, будала се поноси“.

Инфлуенсерките во Македонија не покажуваат ништо, тие се буквално слика без тон. Ниту од нив можете да слушнете некаков став во врска со некоја тема, зафрканција, хумор, тие не одговараат никому, нивните профили не служат за контакт и комуникација со други луѓе. Профилите на инфлуенсерките служат само и исклучиво да ни покажат нам како треба да се живее еден живот.

Какво влијание имаат тие врз своите следбеници?

Една просечна македонска жена која се убива од работа за плата од 200 евра, посакува да го живее животот на инфлуенсерката. Поради ограничените можности, таа е вечно незадоволна. Неа и е виновна државата поради лошиот стандард, сопругот што не е побогат да и приушти патувања, виновни и се пријателките бидејќи не се „ин“ или „модерни“. Се околку неа е виновно за нејзиниот промашен живот. Девојчињата кои се идентификуваат со инфлуенсерките, пак, сонуваат да бидат како нив кога ќе пораснат. И бидејќи нивните инфлуенсерки презентираат лесен и убав живот, нив на памет не им паѓа да си ги испотат газињата и да заработат за таков живот. Напротив, во најдобар случај богато ќе се омажат, во најлош случај ќе бидат швалерки на менаџери на локали или некои локални директорчиња кои ќе им ги плаќаат скапите излегувања, брендираната облека или силиконската уста.

Такво влијание имаат само нашите инфлуенсерки. Од друга страна луѓето кои се интелектуалци пар екселанс немаат веќе влијание врз никој. Тие се затворени во своите кабинетчиња и глумат научници со цел да го сочуваат барем малку своето лично достоинство.

Автор: Стојмановиќ Магдалена