Откако Кривичниот суд даде согласност за да се распише меѓународна потерница, вчера попладне на веб страницата на Министерството за внатрешни работи, националната потерница е сменета со меѓународна потерница и поранешниот директор на УБК, Сашо Мијалков се бара и надвор од границите на земјава.

Мијалков е еден од 12-те обвинети во случајот „Тврдина-Таргет“. По минатонеделните рочишта на кои беа презентирани завршните зборови на одбраната и на обвинителството, за петок е закажано изрекување на пресудата.

За него, обвинителката Ленче Ристоска на рочишето на 16 февруари побара максимална казна.

Мијалков во случајот е обвинет за злосторничко здружување, злоупотреба на службената положба и за примање награда за противзаконито влијание, од кои последното му застарува на крајот на февруари.