Поддршката на Заев за Филипче ќе ја доподели партијата, смета Петровска, Филипче ветува нов систем на работа

Фото/Текст извор: ©magazin.mk

Поддршката на кој било експретседател на СДСМ за сегашните кандидати ќе донесе нови поделби во партијата, изјави во интервју за канал 5 кандидатката за претседателка на СДСМ, Славјанка Петровска прашана дали поддршката на Зоран Заев за нејзиниот противкандидат Венко Филипче му дава предност пред неделните внатрепартиски избори.

Филипче пак на вчерашните средби со граѓаните во Кочани и Струмица истакна дека СДСМ мора да го искористи сиот потенцијал на членството на партијата и дека секој треба да биде слушнат, бидејќи секоја идеја е важна.

На последната средба со граѓаните на Штип, Петровска претставувајќи ја програмата „Манифест за социјдемократијата“ рече дека СДСМ е голема, државничка партија која носела храбри одлуки во интерес на државата, без да калкулира со сопствениот рејтинг.

„Тоа е вредност што треба да продолжиме да ја негуваме. Со исправни, демократски политики, со чесни и докажани луѓе на соодветни позиции ќе го вратиме СДСМ на вистинскиот пат. Затоа, другари и другарки социјалдемократи, ве повикувам во недела да заокружите број 4! Заедно да постигнеме повеќе!“, апелираше Петровска.

Филипче истакна дека ќе се залага за систем на размена на идеи на мислења и комуникација, и тоа ќе биде начин на работа на новото раководство на СДСМ.

Кандидатите за претседател на СДСМ ги претставија своите програми во Кавадарци

„Најважно од сѐ е другарството, најважна од сѐ е релацијата, отвореноста, достапноста. Не може некој да не се јавува или да не комуницира поради тоа што во моментот извршува некаква функција. Ако јас бидам претседател секогаш ќе ви бидам достапен. Јас така знам да функционирам. Таков сум бил како доктор, така сум бил како министер. Тоа е една од работите зошто се нафаќам да се кандидирам на оваа функција. Затоа што сметам дека тој систем може да се имплементира и тука во партијата“, истакна Филипче.

Филипче потенцираше дека тој не верува во наметнати политики, кои ќе ги смислува раководството во Скопје, бидејќи тоа создава револт кај членството.

23.000 членови ќе го бираат новиот лидер на СДСМ

»Вестите на порталот MAGAZIN.MK може да се користат исклучиво за лично информирање. Без писмена дозвола од порталот или посебен договор, не е дозволено превземање, користење или реемитување на вестите, во спротивно ќе следи фактурирање на име "плагијат" во вредност од 20.000 денари.