Иако Здравев не кажа конкретно име, неофицијално, како што посочија и дел од медиумите, станува збор за поранешната в.д. претседателка на скопска „единица“, која дојде на функцијата по Владимир Панчевски!

Судскиот совет на денешната седница донесе одлука за разрешување на судијка од Основниот кривичен суд во Скопје поради нестручно и несовесно вршење на функцијата, односно поради повреди на судскиот деловник по однос на примената на АКМИС, кој се однесува на распределбата на предметите.

„Не можам да ви кажам за кого одлучувавме, но факт е дека имавме посебна точка за утврдување одговорност на судија и нашата одлуката е дека се разрешува од функцијата судија на конкретниот суд поради повреда на одредбите од судскиот деловник по однос на примената на АКМИС. Подетално не можам да ви кажам за предметот од причини што мораме да ја почитуваме презумцијата на невиност. Кога одлуката ќе стане правосилна и ние ќе објавиме во ‘Службен весник’ со одреден мал степен на анонимизирање“,

изјави претседателот на Судскиот совет Киро Здравев по одржување на седницата.

Иако Здравев не кажа конкретно име, неофицијално, како што посочија и дел од медиумите, станува збор за поранешната в.д. претседателка на Кривичен, Татјана Михајлова, која на функцијата дојде по Владимир Панчевски, кој со првостепена пресуда доби три и пол години затвор токму за злоупотреби со АКМИС. Нејзиното име се споменуваше во таа судска постапка, односно дека добивала предмети како подобна судијка. По изјавата на Здравев, кој поради презумцијата на невиност не откри ниту име, ниту повеќе детали како бил злоупотребен електронскиот систем за распределба на предмети, останува нејасно дали меѓу причините се и злоупотреби на АКМИС во нејзиниот мандат како в.д. претседателка.

Постапката е водена околу година и половина, а една од причините е и недоаѓањето на судијката на закажаните расправи во советот. Одлуката за разрешување не е правосилна, а судијката има право на жалба и до Врховен.

Михајлова стана в.д. претседателка на Кривичен во декември 2016 година, а во март 2017 си поднесе оставка. Пред да стапи на функцијата, таа беше позната и по тоа што во нејзини раце се падна случајот „Насилството во Центар“ на СЈО, каде што меѓу обвинетите беа Никола Груевски и Миле Јанакиески, предмет за кој тогаш одлучи дека „бомбите“ не може да се користат како доказ.

Михајлова потоа беше тргната од областа на кривичните предмети, а како што стои и денеска на веб-страницата на Основниот кривичен суд, областа во која се води дека моментално работи е прекршочната материја.

Повеќе на овој ЛИНК!