По две одложувања денеска во Кривичниот суд Скопје започна судењето на поранешниот генерален секретар на Владата, Драги Рашковски и уште шестмина други, обвинети за злоупотреба на службената положба и за перење пари.

Шефицата на обвинителството за гонење организиран криминал Вилма Русковска која денеска ја менуваше Ивана Трајчева на која и’ е истечен мандатот е сигурна дека ќе докаже дека обвинетите местеле тендери и незаконски исплаќале и примале хонорари од Владата. Русковска тврди дека и три години по набавката на двата спорни софтвери тие не функционираат.

Рашковски пак тврди дека обвинителството крие докази. Се изјасни за невин и од судот побара на лице место да биде утврдено дали двата софтвери работат. 

„Многу е тешко да најдете црна мачка во црна просторија. Уште потешко е да ја најдете ако ја нема. Во текот на судењето ќе докажеме дека црна мачка не постои. Многу релевнатни докази се сокриени од судот и од нас, односно известувањето до Јавното обвинителство дека двата софтвери се ставени во функција.“ – изјави Драги Рашковски.

За останатите шест обвинети, Рашковски рече дека не може да ја објасни поврзаноста со нив и дека не му е јасно зошто тие се на обвинителна клупа. Тие пак, исто како и Рашковски, се изјаснија како невини.

Според обвинението, обвинителниот акт, Рашковски ја злоупотребил функцијата генерален секретар на Владата при спроведување на четири тендери меѓу кои и оној за набавка на системот за биометриска идентификација на граѓаните како и софтвер за брзо возење и казнување на возачите.

Рашковски сам си отиде од Владата кога во април минатата година поднесе оставка од функцијата генерален секретар на Владата.