Русија официјално влезе во рецесија откако нејзиниот бруто домашен производ (БДП) падна за 4 отсто во третиот квартал од оваа година.

Ова е првичната проценка која денеска ја објави статистичката агенција „Росстат“.

Трендот, по веќе негативниот резултат на БДП во вториот квартал (-4,1%), во голема мера е под влијание на ефектите од строгите санкции на Западот по воената интервенција на Кремљ во Украина.

Обемот на трговијата на големо падна за 22,6% на годишно ниво, откако санкциите ги затворија странските пазари за руските бизниси и ја прекинаа економијата од увозот на висока технологија.

Прометот на мало опадна за 9,6% по излегувањето на западните брендови и најлошиот колапс на автомобилскиот пазар во историјата.