СДСМ на локалните избори во октомври ќе прави коалиции во секоја општина посебно, најави лидерот на партијата Венко Филипче.

– Ќе го кажам ставот што се уште не е потврден, но сите дискусии одат натаму во рамки на раководството, пратеничката група, Централниот и Извршниот одбор, а тоа е дека на овие локални избори СДСМ ќе прави коалиција за секоја општина посебно, изјави Филипче.

Прашан дали тоа значи дека е можна коалиција со ДУИ во одредени општини, Филипче рече „ќе видиме, ќе разговараме за опциите“, а во однос на можноста за коалиција со ВМРО-ДПМНЕ во Кичево, рече дека тоа „е секогаш интересно прашање, кое зависи од многу фактори“ и за тоа може да се зборува поконкретно во следните месеци.

– Водиме два паралелни внатрепартиски процеси. Првиот процес што ќе следи е избор на претседател на партијата. Мојот мандат завршува на 21 март и изборите се веќе закажани на 16 март. Паралелно на тоа, новите раководства во општинските организации работат на идентификување на имиња, внатрепартиски, но и можни други наши потенцијални коалициони кандидати од други партии или независни листи и граѓански организации, со кои што би разговарале да се поддржиме соодветно коалициски, рече Филипче.

Овој процес, според Филипче, треба да заврши кон крајот на март, за најдоцна во првата половина на април да ги имаат првичните сознанија од анкетите.