Кон крајот на 2019 година ќе биде готова првата фаза од отворањето на научно – технолошки парк во Скопје. Според предлог концептот, тој ќе биде сместен во комплексот технички факултети на УКИМ во населбата Карпош 2.

 Фондот за иновации и технолошки развој е одговорен за проектот кој денеска го презентираше нацрт предлогот за основање на научно – технолошки парк во Скопје. По завршувањето на првата фаза, во втората етапа е предвидено негово проширување во следните пет години со изградба на нови капацитети и лаборатории.

„Среќен сум што имаме не само презентација на извонредна студија која што ја финансираше и Европската унија, туку за разлика од други проекти или стратегии, веќе се обезбедени и целосни финансиски средства и целосна конструкција за тој да стане реалност“ изјави министерот за информатичко општество и администрација Дамјан Манчевски.

Научно – технолошкиот парк во Скопје ќе биде раководен од самиот универзитет.
Според директорот на Фондот за иновации и технолошки развој Јован Деспотовски, концептот се заснова на три столба, и тоа дигитализација во економијата, општеството и државните институции; трансфер на технологии; и акцелерација на старт – ап компании и нивна интеграција во паркот.