Телото од почината жена што вчера околу 13 часот беше најдено и извадено од водите на Вардар кај мостот во Горно Лисиче, е на 39-годишната Даниела Пецевска од Драчево, потврдија од МВР за МИА. И покрај шпекулациите дека деновиве била видена во Битола, таа вчера била пронајдена мртва во водите на Вардар.

Телото вчера беше предадено на обдукција и врз него не се најдени траги на насилство, но се испитуваат причините за смртта, велат од Министерството за внатрешни работи.

По Даниела Пецевска се трагаше од 11 февруари, кога нејзиното исчезнување во полициската станица во Драчево го пријавил нејзиниот сопруг. Тој ден не се појавила на работа и оттогаш ѝ се губи секаков траг. Недостапна беше на мобилен, а последно разговарала со родителите кои ги информирала дека е на работа на “визита” и дека не може да зборува.

Сопругот Дамјан Пецевски веднаш заедно со блиските побара помош и преку социјалните мрежи. Даниела е по потекло од Кичево, мажена беше во Скопје, мајка на три деца од кои две се малолетни.

Таа била вработена како медицинска сестра во Клиниката за гинекологија во Скопје. Сите роднини, пријатели и колеги ја посочуваат како прекрасна личност која секогаш на сите им помагала и со никого нема никаков проблем. Немаше ниту семејни проблеми.

Во наредниот период ќе бидат објавени причините за смртта откако ќе бидат утврдени од Министерството за внатрешни работи.