Трипуновски: Субвенционираме во сточарството за да пиеме домашно млеко

Фото/Текст извор: ©magazin.mk

„Сериозен акцент се даде на сточарското производство. Сточниот фонд во земјава за разлика од пред десетина години е урнисан. Имаме десеткувана бројна состојба на сточниот фонд“, истакна министерот за земјоделство, шумарство и водостопанство, Цветан Трипуновски во „Наткаст“.

„Поради тоа субвенцијата за литар предадено млеко е зголемена. Предвидовме и дополнителни субвенции за оставено женско теле“, појасни министерот Трипуновски.

Министерот додаде дека субвенцијата за грло крава е 8.000 денари. Опозицијата и одредена јавност се обиде да шпекулира дека субвенциите се намалени.

„Јас имам сериозно објаснување, 8.000 денари се надополнуваат со субвенцијата за предадено литар млеко во преработувачки капацитет, која што е зголемена од 5 на 6 денари. Праќам јасен сигнал до фармерите дека ќе добијат зголемена субвенција доколку има зголемена млекопродукција“, истакна тој.

Министерот посочи дека Македонија бележи сериозен пад на производството на млеко, полиците по маркетите се полни со увозно млеко.

„Со стимулација сакаме нашите најмлади генерации, нашето население да пие домашно и квалитетно млеко“, заклучи министерот.

„Ако ја земете субвенцијата по грло и по литар предадено млеко, имаме навистина сериозно зголемување“, додаде тој.

»Вестите на порталот MAGAZIN.MK може да се користат исклучиво за лично информирање. Без писмена дозвола од порталот или посебен договор, не е дозволено превземање, користење или реемитување на вестите, во спротивно ќе следи фактурирање на име "плагијат" во вредност од 20.000 денари.