Жарко Кујунџиски е познат македонски прозаист, драмски писател, уредник на е-магазин, преведувач и колумнист. Уредник е на едно од најпрестижните културни е-магазини „Репер“ во кој се промовирани многу млади и талентирани македонски автори и се развива мрежа на контакти помеѓу креативни умови. Жарко Кујунџиски е и организатор на „Бук Стар Фестивал“ односно фестивал на европската книжевност во Македонија. Поради фестивалот на европската книжевност во Македонија многу реномирани имиња од Европа биле дел од македонската книжевно-културна сцена, што секако е огромен успех за македонската култура и интеркултурниот дијалог.

Годинава Министерството за култура одвоило скромна поддршка за издаваштвото на „Антолог“, но и за електронското издаваштво на е-магазинот „Репер“. Жарко Кујунџиски кој е главен и одговорен уредник на изданијата на „Антолог“ и на е-магазинот „Репер“ се обрати на својот личен фејсбук профил со порака во која се крие длабоко разочарување од одлуката на Министерство за Култура. Со оглед на неговата макотрпна работа во развивање и унапредување на книжевната сцена во Македонија ова разочарување е оправдано. Покрај него, секако и културните работници, но и македонскиот народ воопшто има право да биде разочаран. Фестивалот на европската книжевност е едно од најубавите случувања за македонската култура и е празник за сите кои ја согледуваат важноста на културната димензија за едно општество.  

Во продолжение фрегменти од обраќањето на Кујунџиски на неговиот личен фејсбук профил:

„Знаете дека јас никогаш не се бавам со политика на дневно ниво, но стварноста ме приморува да констатирам: „европскиот фестивал“ и списанието за „критичка мисла“ згаснуваат во период на „европски ориентирана“ влада која се бори за „слободата на говорот“. Од АПСУРД до АПСУРД, од ЛИЦЕМЕРИЕ до ЛИЦЕМЕРИЕ!

Само за потсетување, на „BookStar“ досега гостуваа имиња кои се речиси незамисливи и на кои би ни позавидел секој книжевен фестивал во светот: Јуси Адлер-Олсен (Данска), Евгениј Водолазкин (Русија), Кадер Абдолах (Нидерланд/Холандија), Михал Вивег (Чешка), Марко Шелиќ-Марчело (Србија), Изабел Вери (Белгија), Хокан Несер (Шведска), Захари Карабашлиев (Бугарија), Агата Тушињска (Полска), Славенка Дракулиќ (Хрватска/Шведска), Есмахан Ајкол (Турција/Германија), Офејгур Сигурдсон (Исланд) Дојна Рушти (Романија), Моналди и Сорти (Италија/Австрија), Џамал Уаријачи (Холандија), Михал Ајваз (Чешка), Халдора Тородсен (Исланд), Маренте де Мор (Холандија), Слободан Шнајдер (Хрватска).

Иако поддршката што сме ја добивале во минатото од Министерството за култура била симболична, 20 или 30% од севкупниот буџет, кој буквално секогаш сме го крпеле и дополнувале и со сопствени средства, ваквиот игнорантски однос од МК нЕ фрла во тотална резигнација и ја убива последната ронка надеж дека има зрак светлина на крајот од тунелот.

Убивањето на БУКСТАР многу повеќе зборува за нашиот ментален склоп отколку за квалитетите на самиот БУКСТАР/АНТОЛОГ. Неговото несместување во „проект со национална важност“ укажува на кое дереџе сме. Наместо отворање кон ЕУ и кон светски стандарди на работа, во програмата на МК може да се види поддршка на приватни, локални или, во најдобар случај, регионални иницијативи, поддршка која непропорционално и без критериуми се движи како обезглавена змија од симболична до баснословна.“

Ова беше дел од обраќањето на Кујунџиски на неговиот фејсбук профил по што доби низа реакции од јавноста. Покрај Кујунџиски на својот фејсбук профил се огласија и други културни дејци од Македонија со реакција поради нејасната одлука на Министерството за Култура да не ги финансира нивните значајни и реномирани проекти.

Автор: Стојмановиќ Магдалена 

-Преземањето на содржините од личниот профил на Жарко Кујунџиски е направено со писмена дозвола од авторот и корисник на профилот.