Во денешното гостување во емисијата „Вин Вин“ на телевизија Телма, министерката за образование и наука Мила Царовска говореше што би можело да се очекува со отворање на училиштата и враќањето на родителите на работа. Имено таа истакна дека очекува епидемиолошката слика да се измени. Царовска посочи доколку на есен се зголеми бројот на новозаболени од Ковид-19 постои можност  да се сменат дел од одлуките.

Таа исто така посочи дека моментално Владата будно ја следи состојбата со коронавирусот.

-На секои две недели се преиспитуваат и се носат одлуки. Нашата држава покажа дека знае да се справи со ситуацијата. И верувам на Комисијата за заразни болести. Нашиот здравствен систем не беше оптоварен. Тоа ми дава за право да верувам дека Комисијата носи добри одлуки, вели Царовска.

Министерката рече дека Македонија е една од ретките земји кои се решија за постепено отворање на предучилишните и училишните установи и примената на комбиниран модел- физичко присуство и онлајн настава и со тоа е намален бројот на заболени. Посочи дека многу од земјите во кои биле отворени училиштата за сите деца, биле брзо затворени поради влошување на епидемиолошката слика.

Министерката верува во креативноста и ентузијазмот на учениците да се создаде нешто ново.

Затоа ги повикувам сите ученици од основните и средните училишта да осмислат лого, насловна фотографија и име на Единствената национална платформа за онлајн учење. Пријавувањето на Јавниот повик “Од учениците за учениците” е до 22 септември. Ги очекуваме вашите иновативни и креативни идеи.