Со едногласна одлука од сите тројца судии во Федералниот суд во Мелбурн, донесена е пресуда – Новак Ѓоковиќ мора да ја напушти Австралија, нема да игра на Отвореното првенство во Мелбурн каде требаше да ја брани титулата и ќе мора да плати отштета од 500.000 австралиски долари.

За одлуката на судот да се депортира Ѓоковиќ се огласи и австралискиот премиер Скот Морисон.

„Федералниот суд на Австралија едногласно одлучи да го отфрли барањето на господинот Новак Ѓоковиќ за судското преиспитување со кое сакаше да се оспори одлуката на минстерот за имиграција да му ја укине визата. Оваа одлука за откажување донесена е поради здравјето, сигурноста и редот, бидејќи тоа беше во јавен интерес. Ја поздравувам одлуката нашите граници да се одржат силни и Австралијците безбедни“, изјави премиерот.

Ѓоковиќ се соочи со главниот судија Џејмс Алсоп, судијата Ентони Бесанко и судијата Дејвид О’Калаган во целосната судска проверка на одлуката на министерот за имиграција Алекс Хок да ја укине визата број 1 на светот на тенисот.

Одлуката на Федералниот суд беше едногласна со тоа што на Ѓоковиќ му беше наредено да ги плати сите правни трошоци направени од владата.

Судиите не ги наведоа причините за нивните одлуки, но рекоа дека тоа ќе го сторат во наредните денови.

Ѓоковиќ сега нема да може да се натпреварува на Австралија опен што започнува во Мелбурн во понеделник.

Сега ќе одвојам малку време да се одморам и да се опоравам, пред да дадам дополнителни коментари освен ова. Крајно сум разочаран од одлуката на судот да го отфрли моето барање за судска проверка на одлуката на министерот да ми ја одземе визата, што значи дека не можам да останам во Австралија и да учествувам на Австралија опен“, рече Ѓоковиќ по одлуката!