Бранителите на поранешната специјална обвинителка Катица Јанева, адвокатката Ирена Фрчкоска и Дељо Кадиев изразија разочарување од пресудата, со која Јанева доби седум години затвор, и покрај тоа што како што велат немало докази дека таа е виновна.

Адвокатите најавија и жалба за пресудата, и велат дека ова е преголема казна.

-Ние сме разочарани како одбрана на Катица Јанева од пресудата и казните што ги слушнавме. Прво сметаме дека казната е превисока. Судот во својот вовед кажа дека со оваа пресуда сака да се врати довербата во правосудството, но ние како одбрана сметаме дека со вакви пресуди не се враќа довербата во правосудството. Напротив, сметаме дека судот треба да суди врз основа на докази, а во конкретниот случај, докази дека Катица Јанева го сторила кривичното дело за кое е осудена не постојат, рече денеска во изјава за медиумите адвокатката Ирена Фрчкоска.

Адвокатот КАДИЕВ, најави жалба на пресудата и исто така тврди дека немало ниту еден доказ дека Јанева е виновна.