„Она што официјално како податок постои во НБРМ е дека на годишно ниво помеѓу 460-500 милиони евра влегуваат официјално.Меѓутоа, неофицијално, бројките одат и до една милијарда, што е огромен капитал кој влегува во Македонија”, истакнува. Едмонд Адеми, министер без ресор во Владата на Република Македонија, задолжен за дијаспората во интервју за новинската агенција Анадолија.

Република Македонија како држава има долга традиција на иселување на населението во различни земји од светот, каде што граѓаните мигрираат поради различни причини, но најчесто поради економските. Во разговор за Анадолија зборуваше за важноста на дијаспората, нејзините потреби и проблеми, но и за активностите кои тој како министер и Владата на Република Македонија ги спроведуваат за поврзување на дијаспората со земјата, не само од културен, туку и од економски аспект.

Како што истакнува министерот Адеми во разговорот, не постои конкретен статистички податок во која држава колку иселеници од Македонија има точно, постојат различни информации, но како што вели тој, претежно, дијаспората од Македонија живее во неколку европски земји, меѓу кои Германија, Швајцарија, Италија, Австрија и Шведска, додека во другите европски земји ја има во помал број, а на другите континенти, во Канада, САД и Австралија, исто така, живее бројна дијаспора која потекнува од Македонија.