Очигледно предметот “Тендери” на СЈО, кој се однесува на поранешната министерка за култура, актуелна пратеничка, Елизабета Канческа Милевска ќе добие надградба со уште неколку спорни објекти, освен музејот на ВМРО.

Имено дека СЈО не мирува, лично изјави актуелниот министер за култура, Адеми, кој истакна дека во министерството скоро секој ден има истражители на Јанева.

Станува збор за документи што се дел од истрагата за проектот „Скопје 2014“, односно за градењето на 10 објекти за кои постои сомневање дека при нивна изградба биле проневерени пари.

Министерот за култура, Асаф Адеми, во гостување на телевизиска емисија на ТВ 21 откри дека вработени во министерството секојдневно фотокопираат документи на барање на Специјалното јавно обвинителство и Управата за финансиска полиција.

Адеми вели дека неколку вработени по цел ден фотокопираат документи.

Замислете колку обемна документација беше потреба да се исфотокопира и да им се достави на истражните органи. Верувајте дека значителен број вработени во Министерството не прават ништо друго освен што копираат документи. – изјави Адеми.

СЈО за проектот “Скопје 2014” има отворено еден предмет, каде првообвинета е Канческа Милевска при што во објавата Обвинителката Фатиме Фетаи истакна:

Специјалното јавно обвинителство (СЈО) откри дека последниот тендер од еден милион евра за завршните работи за Музејот на ВМРО бил наместен. Станува збор за нова истрага на СЈО, со кодно име „Тендери“, во која првоосомничена, е министерката за култура Елизабета Канческа – Милевска.

Освен неа, осомничени за злоупотреба на службената положба се уште три членови на комисијата за јавни набавки.

Според обвинителката Фатиме Фетаи, на 14 јуни 2011 година по телефон, министерката за култура Елизабета Канческа Милевска на раководното лице од фирмата Бетон – Штип, му кажала да ги работи завршните работи на Музејот на македонската борба, а дека тендерот ќе биде објавен подоцна.

Министерката, според СЈО, рекла дека сe е договорено за ниту една друга фирма да не може да го добие тендерот.