Албанскиот Институт за статистика во 2020 година ќе спроведе Попис на населението – домаќинствата и земоделските стопанства – девет години по последната статистичка операција.

За првпат во пописниот формулар ќе постои графа на која граѓаните ќе може да ја искажат по своја волја етничката и верска припадност.

Директорката на Институтот – Делина Ибрахимај посочува дека по првпат попишувачот ќе го поставува и прашањето за етничката како и верската припадност но бидејќи тоа е лично право на секој поединец ова прашање не е задолжително да се одговори.

“Во формуларот ги поставуваме прашањата за етничката и верска припадност – но на нив одговорот не е задолжителен. Даваме можност секој поединец слободно да одговори или не на овие прашања. Тоа со цел да се избегнат многуте дебати присутни при претходните пописи.” – нагласува Ибрахимај.

Со цел да се надминат проблемите со личните податоци – Инситутот во подготовката на формуларот соработувал со Комесарот за заштита од дискриминација и ги почитувал стандардите на европските земји – Обединетите нации и Канцеларијата за статистика при ЕУ.

Пописот од 2011 година го бојкотираа припадниците на малцинствата па попишувачите ги попишуваа врз основа на податоците од матичните служби на населеното место.

Македонија Попис на население нема спроведено од 2002 година или цели 16 години а македонскиот колега на Ибрахимај – Апостол Симовски истакна дека Попис ќе имаме во 2021 година и дека полето за “етничка и верска припадност” воопшто и не треба да биде дел од пописниот материјал.

“Од статистичка гледна точка – етничката припадност и вероисповедта не играат никаква улога – бидејќи тоа се менливи категории и јас ќе се залагам овие две работи да не бидат дел од претстојниот пропис – туку единствено делот за мајчиниот јазик на лицата кои ќе бидат попишувани. Јазикот што се зборува во семејството е задолжителна категорија и таа секако ќе ја регистрираме.”