Турскиот претседател Реџеп Тајип Ердоган денеска одби да се сретне со советникот за национална безбедност на Белата куќа, Џон Болтон, поради „ставовите на САД кон турската офанзива против терористите во Сирија“, објави електронското издание на весникот „Дејли Сабах“.

На прашањето од новинарите зошто не се сретнал со Болтон, Ердоган изјави дека американскиот дипломат имал „средба со својот колега“ во Анкара, а тој би можел телефонски да разговара со американскиот претседател Доналд Трамп.
 Џон Болтон во Анкара имаше средба со советникот на Ердоган, Ибрахим Калин, посветена на најавената турска офанзива против Силите за заштита на народот на сириските Курди.
По нивните разговори, Болтон изјави дека побарал гаранции од Турција дека нема да ги нападне Силите за заштита на народот, наведувајќи дека тоа е „услов“ што го поставл Трамп за повлекување на силите на САД од североисточниот дел на Сирија.

На оваа изјава на Болтон реагираше Ердоган, кој изјави дека Турција не може да ги прифати неговите коментари дека Анкара мора да се согласи да ги заштити курдски сојузници на Вашингтон во Сирија.
Во говорот кој го одржа пред членовите на неговата Партија на правдата и развојот (АКП) во турскиот Парламент, Ердоган рече дека Болтон направил „сериозна грешка”, повикувајќи на нови услови за повлекување на американските сили од Сирија и оти Турција не може да прифати компромис по прашањето на Силите за заштита на народот.