Првиот круг на претседателските избори го обележа ниската излезност скоро низ цела Македонија. Граѓаните со ова испратија порака до власта и опозицијата, дека сите политички партии без разлика на идеолошката и етничката определеност се без идејни и немаат политичка понуда која ќе го мотивира македонскиот гласач да излезе на избори.
Консензуалниот кандидат на СДСМ и ДУИ Стево Пендаровски успеа да освои 323.000 гласови што е во рамките на партиската база на СДСМ, а рамката на партиските гласови не успеа да ја пробие и непартискиот кандидат на ВМРО-ДПМНЕ Гордана Силјановска-Давкова со освоени 319.000 гласови. Блерим Река како кандидат на БЕСА и Алијанса за Албанците е најголемо изненадување и покрај ниската излезност кај албанскиот електрат освои 74.000 гласови со што го загрози приматот на ДУИ кај Албанците.
На теренот на овие избори има губитник, тоа дефинитивно е двоецот Заев и Ахмети, но со сигурност Христијан Мицковски не е победник. Бројките тоа го потврдуваат.
Така на локалните избори во Битола, СДСМ освоила 31.000 гласови за на претседателските избори да падне на 17.000, Ѓорче Петров од освоени 13.300 гласови поддршка изгубиле за цели 6000 гласови, во Гази Баба е драстичен падот и од 17.000 гласови на локалните избори за претседателски избори се симнале на 9000. Овие избори СДСМ ги загуби и во Аеродром, а значитечлно ја намали и поддршката во Карпош и Центар, а ги загубија и Штип и Велес со преку 2000 разлика.
Насилната промена на името, непотизмот, корупциските скандали и слабиот учинок на градоначалниците го наплатија политичкиот данок.
Успех за ВМРО-ДПМНЕ е што ја врати предноста во главниот град и повторно ги освои т.н бастиони во Кисела Вода, Бутел, Гази Баба, Ѓорче Петров и други општини во внатрешноста.
Но остриот пад на поддршката за власта за посериозен пресврт не успеа да ја искористи ниту ВМРО-ДПМНЕ предводена од Христијан Мицковски. Од локалните избори досега ВМРО-ДПМНЕ изгубило 16.000 гласови и тоа се гласовите од партиите на помалите етнички заедници кои преминаа во таборот на власта. “Гревот” на ВМРО-ДПМНЕ е што не успеа во овој период да промовира политичка понуда за да ги привлече неопределените гласачи кои СДСМ за многу краток период ги загуби.
ВМРО-ДПМНЕ ќе поентираше на овие избори доколку изградеше автентична програма која ќе понудеше алтернатива на владеењето на СДСМ надоградена со силни кадровски решенија околу себе. Мицковски во наредниов период ќе има тешка задача да ја убеди неопределената јавност дека тој е алтернативата на веќе делегитимираната власт. Во спротивно, ќе остави простор Заев да се консолидира до следните парламентарни избори.
Заклучокот за претседателските избори е дека ова е почетокот на крајот на владењето на СДСМ и ДУИ, а ДУИ тешко дека ќе го преживее статусот на најголема албанска партија на следните парламентарни избори. Зоран Заев најверојатно ќе има понуда за тежок избор, ќе мора да избере кој ќе му биде главен албански партнер за вториот круг, Што и да одлучи, веројатно е дека ќе ја разниша владината коалиција и ќе го отвори патот за распишување на предвремени парламентарни избори.
»Вестите на порталот MAGAZIN.MK може да се користат исклучиво за лично информирање. Без писмена дозвола од порталот или посебен договор, не е дозволено превземање, користење или реемитување на вестите, во спротивно ќе следи фактурирање на име "плагијат" во вредност од 20.000 денари.
You must be logged in to post a comment.