Лидерот на ДУИ, Али Ахмети, им честиташе на косовските лидери што достоинствено одговориле на “повикот на правдата“ на Хаг и им посака брзо враќање на функциите откако ќе посведочат за „вистинските слободарски цели“ на војната што ја водеа како ОВК, објави Независен!

-Војната на Ослободителната војска на Косово беше вистинска војна на албанската нација за слобода и самоопределување, но исто така и за правда и владеење на правото, демократско општество ориентиранo кон евро-американските вредности.

Убеден сум дека моите пријатели, мои колеги соборци, ќе посведочат за вистинската војна на Ослободителната војска на Косово и ќе се вратат како победници, истовремено целосно почитувајќи го владеењето на правото и локалната и меѓународната правда.

И јас, и моите пријатели, ако имаме живот, можност и посветеност да се бориме за слобода и еднаквост, ќе го сториме тоа повторно затоа што верувавме и верувавме во правото на нашата нација. Сите наши достигнувања во овие децении се постигнати  заедно со нашите меѓународни пријатели, почитувајќи ги вредностите прифатени од сите нас, и заедно ќе го завршиме патот кон слободата, независноста, правдата и интеграцијата.

Владеењето на правото и вистинската неизборна правда се цели на сите нас, па затоа им честитам на косовските лидери што одговорија на повикот на правдата на најдостоинствен начин и им посакувам брзо враќање на нивните должности што ги чекаат“, стои во пораката на Али Ахмети.

Ахмети е еден од многуте бивши функционери на ОВК кој беше повикан од судот во Хаг, како што тврдат од неговата партија, само како сведок иако практика на судот е да не најавува однапред кого ќе обвини за делото што го расветлува. И да не биде директно засегнат, индиректно како бивш висок функционер во ОВК во периодот што се истражува, тој е засегнат во голема мерка од случувањата и неговиот ореол на борец за слобода може да биде исфлекан од пресудите што може да следат во Хаг.

Специјалното обвинителство на Косово синоќа соопшти дека во средата и вчера се уапсени Хашим Тачи, Кадри Весели, Реџеп Сељими и Јакуп Красниќи, кои од синоќа се ставени во притвор на специјализираните совети на Косово во судот во Хаг.

Во соопштението се напоменува дека судија на претходна постапка на Специјалниот совет за Косово на 26 октомври го потврдило обвинението против нив четворица.