Демократскиот претседателски кандидат Џо Бајден изјави денеска дека е загрижен што претседателот Доналд Трамп ќе се обиде да ги „украде“ изборите во ноември, но е сигурен дека војниците ќе го извадат од Белата куќа ако загуби и нема да сака да го признае резултатот, објавува Прес 24.

Тој не прецизираше како републиканецот Трамп би можел да мами на изборите. Но, поранешниот потпретседател потсети дека Трамп жестоко се спротивставува на дописното гласање и најави дека демократите ќе имаат адвокати на избирачките места за да ги спречат републиканците да манипулираат со ливчињата.

Трамп во неколку наврати го критикуваше дописното гласање, велејќи дека без никави докази поголемиот удел на дописни ливчиња би довел до масовна кражба на гласови на изборите на 3. ноември.

Бајден рече дека коментарите на поранешните воени заповедници, кои го критикуваат одговорот на Трамп на протестите против полициската бруталност, го увериле дека американската војска ќе интервенира ако Трамп не ги признае резултатите од изборите.

„Апсолутно сум уверен дека експресно ќе го извадат од Белата куќа“, нагласи Бајден.

Бајден и претходно јавно предупредуваше дека Трамп би можел да мами на изборите. Но, неговата реторика се заостри последните месеци, во време кога анкетите покажуваат предност на поранешниот потпретседател над претседателот и кога Трамп се повеќе се спротивставува на дописното гласање.

Трамп и републиканците сметаат дека на дописното гласање може да се мами и дека тоа ги фаворизира демократите, иако тоа го демантираат бројни независни студии.