Во изјава за Канал 5 телевизија, Павле Богоевски, поранешниот пратеник и некогашен првоборец на „Шарената револуција“ истакна дека тие протестираа во поддршка за СЈО но не за Катица Јанева како поединец и прв човек на обвинителството.

Ние протестиравме во поддршка за СЈО, но никогаш не протестиравме за Катица Јанева, вели Богоевски.

Богоевски додава дека на целата ситуација и моменталните случувања во државата гледа како шанса дека она за што се бореле биде сторено, и сите оние кои се виновни ќе одговараат.

Ние протестиравме за функционерите, доколку направат некакви кривични дела, да бидат повикани на одговорност за истите. Иако е многу разочарувачки случајот „Рекет“, ова го гледам како шанса да се покаже дека тие работи за коишто се боревме ќе бидат применети на дело и дека луѓето кои биле или се функционери, ќе одговараат доколку направиле кривично дело, рече Богоевски во изјава за „Канал 5“.

Инаку Павле Богоевски го даде својот став, откако денеска и обвинителката Лиле Стефанова, се огради од Јанева и истакна дека од самиот почеток на работата на СЈО таа била воздржана кон работата на Јанева, а вчера, пак, Фатиме Фетаи порача дека секој што се огрешил пред законот треба да одговара.