Цената на бензините од ноќеска на полноќ се зголемува за половина до еден денар, а дизел горивата поевтинуваат за половина денар по литар, одлучи денеска Регулаторната комисија за енергетика (РКЕ).

Со одлуката се врши зголемување на малопродажните цени на нафтените деривати во просек за 0,26 отсто.

Малопродажната цена на ЕУРОСУПЕР БС-95 се зголемува за половина денар и ќе изнесува 67,5 денари, додека ЕУРОСУПЕР БС-98 поскапува за еден денар и ќе чини 70 денари за литар. Малопродажните цени на ЕУРОДИЗЕЛ (Д-Е V) и на Екстра лесното масло за домаќинство (ЕЛ-1), се намалуваат за половина денар и ќе изнесуваат 61,5, односно 50 денари за литар.

Со одлуката на РКЕ за 0,302 денари за килограм се зголемува и малопродажната цена на мазутот М-1 НС и ќе чини 33,134 денари.

Како причина за новите цени на нафтените деривати од РКЕ ја посочуваат промената на референтните цени на нафтените деривати на светскиот пазар во изминатите седум дена и тоа зголемувањето кај бензинот во просек за околу 2,18 отсто и намалувањето за околу 1,5 отсто кај дизелот и за 1,94 отсто кај екстра лесното масло, како и за 0,29 отсто повисокиот курс на дорларот во однос на денарот.

Уште една важна вест за возачите, се уште се прават анализи за цената на зелениот картон.

Министерството за финансии, заедно со Агенцијата за супервизија на осигурувањето и осигурителната индустрија АСО), се уште ги прави анализите за корекција на цената на зелениот картон.

Ова го соопшти претседателот на Советот на експерти на Агенција за супервизија на осигурувањето Климе Попоски, кој не прецизираше доколку има корекција кога би стартувала.

-Се прават анализи од страна на Министерството за финансии, осигурителната индустрија, како и Агенцијата за супервизија на осигурување со цел да видиме дали постојат некои реформски зафати во делот на одредени корекции како зелената карта. Меѓутоа, од она што сакаме да дојдеме како крајна цел, а секако тоа е ценовната либерализација на автоодговорноста, изјави Попоски одговорајќи на новинарски прашања при денешното одбележување 10 години постоење на АСО.

Промената на цената на зелениот картон ја најави премиерот Зоран Заев на партиска трибина минатиот месец. Како што рече, се работи на намалување на цената на зелениот картон за осигурување возилата.

-Сакаме да ја намалиме цената на зелениот картон, сакаме да ги поедноставиме патарините, што се плаќаат за патишта, сакаме да ја рационализираме и поедноставиме регистрацијата на возилата и со тоа да им заштедиме на граѓаните од трошоците, да им вратиме пари назад на граѓаните, рече Заев на граѓанската трибина „На прав пат“ во Куманово минатиот месец.

Во земјава сега возачите имаат можност да извадат зелен картон заедно со регистрацијата на возилата со важност од една година и со едномесечна важност.

Центата на едномесечниот кзелен картопн е 30 евра за возила до 66 КW и 60 евра за над 66 КW. Цената на годишниот зелен картон е 3690 денари, односно 5.536 денари.