Јанева беше само персонализација на општиот гнилеж и распад на институциите – се’ додека не ја претворија во кутра самохрана и невработена мајка, пишува на социјалните мрежи професорката Биљана Ванковска.

Ова ни во најдобрата политичка сатира не би можело да се измисли, а вистина е:

„Најголем дел од дополнителните 157.000 евра Јанева ги добивала како додаток за доверливост – да не открива што чула во „бомбите“, а земала и надоместоци за кирија и за тоа што работела вон градот во кој живее.“

Замислете, државата ја плаќа (поткупува/потплаќа/натплаќа) за да си ја врши работата, т.е. да не открива што слушнала во „бомбите“!!??? Тоа е како мене да ме плаќаат со илјадници евра за да држам предавања и испити – надвор од платата (која ми е 700 евра, т.е. најмалку пет пати пониска од таа на Кејти)!
Веќе одамна кажав дека Јанева не е толку специјална, колку што државата ни е со посебни/специјални потреби.

Таа беше само персонализација на општиот гнилеж и распад на институциите – се’ додека не ја претворија во кутра самохрана и невработена мајка.

Овде сите глумат лудило, а главен поткупувач и најкорумпиран актер е токму државата – таа која ни потфрла преку астрономски буџет трошки за да гласаме за неа и која вака купува „доверливост“.

Ова е Потемкинова Македонија 🙁 Не можеме да ја исплачеме колку е за жалење што нам ни се паднала, пишува Ванковска.

Поранешната специјална обвинителка Катица Јанева завчера беше пуштена во куќен притвор. Обвинителката Вилма Русковска лута на одлуката најавува истрага против судиите во Апелација.

Катица Јанева за првпат од 21 август годинава ќе ја помине во домашна атмосфера откако Апелацискиот суд и ја укина мерката притвор и ја испрати во домашен притвор.