Македонскиот ракометен првак Вардар вечерва го покажа македонскиот непокор. Со срце на терен, си ја оствари целта и на последниот меч во Скопје од Лигата на шампионите во рамки на четвртфиналето со 31-23 (14-12) славеше над унгарски ПИК Сегед и си обезбеди залиха пред реваншот во Унгарија.

Ова беше последниот натпревар на македонскиот ракометен првак Вардар, во овој состав, па најверојатно тоа беше поттик за ракометарите бквално да покажат магија на теренот.

Вардарци успеаа во целта и го совладаат Пик Сегед со 31-23 и го трасираа патот кон третото учество на Ф4-турнирот во Келн.

Капитенот на Вардар, Стојанче Стоилов рече „сè ќе оставиме зад нас, мислиме само на Сегед.“ Токму тоа го покажаа денес, покажаа дека се фокусирани, максимално сериозни и посветени на мисијата да се простат од црвено-црниот дрес со нов пласман на завршниот турнир во Лигата на шампионите.

Избраниците на Роберто Гарсија Парондо беа одлични на тактички план, а ПИК Сегед речиси цел натпревар бркаше негатива, но ниту еднаш не успеа да ја достигне. Вардар дојде до висока позитива пред реваншот во Унгарија и гледа кон ново учество на Ф4-турнирите во ракометната елита, трето по ред.

За овој тим на Вардар ова беше последен натпревар во Скопје, затоа што Сергеј Самсоненко, досегашниот спонзор на тимот, се повлече од Вардар, и по крајот на оваа сезона повеќе нема да го финансира клубот со кој нижеше незаборавни моменти и успеси. Реваншот во Унгарија меѓу ПИК Сегед и Вардар е закажан на 5 мај.

Целата фотогалерија може да ја погледнете ТУКА.