На банкетот кој го приреди Кралицата Елизабета Втора, во чест на Американскиот претседател Доналд Трамп, гостите имале можност да ја слушаат музиката на Хендл, но и британскиот поп-пејач Ед Ширан и гајди.

Луксузниот банкет кој британската кралица Елизабета Втора минатата ноќ го приреди во Бакингемската палата во чест на првата државничка посета на претседателот на Америка Доналд Трамп, го обележаа нивните гости и здравиците, но посебно го привлече и менито кое беше послужено за повеќе од 170 гости, и виното кое чини околу 1.600 евра по шише.

Како што наведува Би-би-си, на раскошно украсената маса, во чиниите, се нашле филети од иверка подготвени на пареа, младо виндзорско јагнешко месо, а за десерт бил послужен сув растресит колач од јагоди со крем од лимон вербена, за потоа да следуваат свежо овошје, кафе и ситни колачи.

На гостите кои присуствуваа на вечерата, им биле понудени два вида англиски луксузни вина, црвено вино „Шато Лафит-Ротшилд“ од 1990 година, чие шише достигнува цена и до 1.395 фунти (1.600 евра).

Како што пишува Би-би-си, американскиот претседател не пробал ниту едно од овие вина, бидејќи воопшто не пие алкохол.

Претседателот Доналд Трамп и неговата сопруга Меланија ќе бидат во три дневна посета во Обединетото Кралство.