Големите и силни дождови вчера предизвикаа сериозни проблеми во северниот дел на Грција.

Најпогодени се Халкидики и Тасос, а на шест острови прогласено е вонредна состојба. Дождовите предизвикаа поплави и лизгање на земјиштето, а сообраќајот е блокиран во погодените подрачја.

Силната надојдена вода носеше автомобили низ улиците.

Минатата година исто така дожд и силен ветар го зафатија северниот дел од Грција и предизвикаа големи проблеми за туристите, а одделни места беа погодени и од поплави.

Грчки медиуми објавија инсерти од поројни дождови, што ги зафатија меѓу останатите и Лепотокарија, Парајлија, Неа Врасна, Парга, Ханиоти, Пефкохори, Трикали и Торони.

Температурата во одделни места била околу 15 степени Целзиусови. Во дел од градовите од одделни хотели беа евакуирани туристи, меѓу кои и од хотел на Ситонија, каде беа евакуирани поради река, која се излеала од коритото и го поплавила целото подрачје.