Протестите и немирите за смртта на Афроамериканецот Флојд продолжија во саботата од Њујорк преку Чикаго до Лос Анџелес, со судири меѓу полицијата и демонстрантите и палење полициски автомобили.

Протестите продолжија во раните утрински часови а националната гарда е распоредена во десетина држави, како и во округот Колумбија.

Заклучно со четвртокот, уапсени се речиси 1.400 луѓе во 17 градови во САД. Повеќе од третина од уапсените се во Лос Анџелес.

Властите во Минеаполис соопштија дека успеале да ги запрат насилните протести во кои беа уништени делови од градот.

Полицијата и припадниците на Националната гарда се судрија со демонстрантите кои излегоа на улиците веќе петти ден по ред и покрај полицискиот час. Група демонстранти се движеа кон центарот на градот кога полицијата пукаше солзавец и гумени куршуми.

Во главниот град Вашингтон во текот на ноќта, запалена беше зграда во центарот на Вашингтон, во близина на историскиот хотел Еј Адамс.

Едно лице загинало и најмалку уште две се ранетов во Индијанаполис во американската сојузна држава Индијана, во пукање во текот на немирите по полициското убиство на афроамериканецот Џорџ Флојд, додека двајца членови на телевизиската екипа на агенцијата Reuters исто така во саботата ноќта се повредени со гумени куршуми додека ги снимале протестите во Минеаполис каде што се случи последниот инцидент со полициска бруталност кој предизвика протести и безредија ширум САД.