Иранските власти соопштија дека најмалку 70 лица загинаа во големите поплави кои ја зафатија југозападната провинција Кузестан во Иран.

Министерот за внатрешни работи, Абдолреза Рамани Фази изјави дека околу 400.000 лица се загрозени и изложени на евакуација во оваа провинција, која брои околу пет милиони жители. Во девет градови и десетина села се евакуираат жителите, јави „АП“.

Оваа провинција, во претходните години била погодена од повеќегодишна суша.
Загрозените жители на Кузестан, спасувачките екипи ги пренесоа до три воени касарни а исто така се згрижени и во најблиските засолништа.

Иранската Влада исто така пред два дена нареди евакуација на 70 села поради опасност од поплави во провинцијата Кузестан која е богата со нафта.
Селата се наоѓаат во близина на реките Дез и Карке.

Најмалку 47 лица загинаа во последните две недели во поплавите кои, поради најобилните врнежи во последните 10 години погодија повеќе ирански провинции, од северот до југот на земјата.

Во неколку провинции е прогласена вонредна состојба, а десетици илјади луѓе мораа да се евакуираат.
Властите во Техеран апелираа на граѓаните да не се доближуваат до реките и областите во близина на брани. Обилните поплави погодија најмалку 26 од 31 провинции во Иран од почетокот на врнежите на 19 март.